09.06.2026 | 23:19
Կանանց Հայաստանի հավաքականը 0:6 հաշվով պարտվեց Բելառուսին. ՏԵՍԱՆՅՈՒԹ
3000 դրամ կաշառքի գործը Հակակոռուպցիոն դատարան է ուղարկվել
Հասարակություն
02.11.2023 | 13:57
Հոկտեմբերի 31-ին Հակակոռուպցիոն քրեական դատարան է ուղարկվել Վրաստանի քաղաքացի Ռատի Ակակիի Խուբաշվիլիի վերաբերյալ գործը, որի շրջանակներում նա մեղադրվում է պարեկներին կաշառք առաջարկելու մեջ։
Ըստ գործի նյութերի՝ Խուբաշվիլիին մեղադրանք է առաջադրվել այն բանի համար, որ նա ՀՀ պետական սահմանի Բագրատաշենի անցակետի մոտ ՀՀ ներքին գործերի նախարարության ոստիկանության պարեկային ծառայության Տավուշի մարզի գումարտակի 2-րդ վաշտի 1-ին դասակի կրտսեր պարեկ Խաչիկ Միրումյանին և նույն դասակի պարեկ Նվեր Գալստյանին առաջարկել է 3069.2 ՀՀ դրամին համարժեք 20 լարի կաշառք` վերջիններիս կողմից իշխանական լիազորություններն օգտագործելով իր օգտին ապօրինի անգործություն դրսևորելու համար:
Այսպես. Պետական մարմնի` Հայաստանի Հանրապետության ներքին գործերի նախարարության ոստիկանության անունից մշտապես հանդես գալու լիազորություն ունեցող, ոստիկանության անունից իրավունք, պարտականություն կամ պատասխանատվություն առաջացնող գործառույթներ իրականացնող պաշտոնատար անձինք` Հայաստանի Հանրապետության ներքին գործերի նախարարության պարեկային ծառայության Տավուշի մարզի գումարտակի 2-րդ վաշտի 1-ին դասակի կրտսեր պարեկ Խաչիկ Միրումյանը և նույն դասակի պարեկ Նվեր Գալստյանը ծառայողական ավտոմեքենայով 2023 թվականի հոկտեմբերի 07-ին, ըստ սահմանված գրաֆիկի, ծառայություն են իրականացրել «Նոյեմբերյանի 1-ին» տեղամասում, որն ընդգրկել է նաև ՀՀ պետական սահմանի Բագրատաշենի անցակետին հարող տարածքը:
Ծառայության ընթացքում՝ ժամը 07:30-ի սահմաններում պարեկային ծառայության աշխատակիցները նկատել են երթևեկելի մասի եզրին ոչ զուգահեռ կայանված «Մերսեդես» մակնիշի բեռնատար ավտոմեքենա, որից հետո մոտենալով նշված ավտոմեքենային՝ պահանջել են անհրաժեշտ փաստաթղթերը:
Բեռնատարի վարորդ Ռատի Խուբաշվիլին առաջարկել է պարեկային ծառայության աշխատակիցներին պայմանավորվել ավտոմեքենան մեկուկես ժամ նշված վայրում կայանելու և տվյալ պահին չտեղաշարժելու շուրջ: Պարեկային ծառայության աշխատակիցները, վարորդին պարզաբանելով նշված արարքի անօրինականությունը, վարորդից կրկին պահանջել են փաստաթղթերը, որից հետո Ռատի Խուբաշվիլին ՀՀ ներքին գործերի նախարարության ոստիկանության պարեկային ծառայության Տավուշի մարզի գումարտակի 2-րդ վաշտի 1-ին դասակի կրտսեր պարեկ Խաչիկ Միրումյանին է փոխանցել անձնագիրը և այլ փաստաթղթեր: Բացելով անձնագիրը՝ Խաչիկ Միրումյանը նկատել է 20 վրացական լարի, որից հետո հարց է ուղղել վարորդ Ռատի Խուբաշբիլիին, թե դա ինչ է, ինչին ի պատասխան՝ վերջինս առաջարկել է ոստիկաններին վերցնել գումարը՝ նպատակ ունենալով 3069.2 ՀՀ դրամին համարժեք 20 լարի կաշառք տալու դիմաց ավտոմեքենան վերոնշյալ խախտմամբ շարունակել կայանել երթևեկելի մասի եզրին ոչ զուգահեռ։ Խաչիկ Միրումյանը և Նվեր Գալստյանը չեն ընդունել կաշառք տալու առաջարկը և պաշտոնատար անձին կաշառք առաջարկելու անմիջականորեն ծագած հիմնավոր կասկածի հիմքով ձերբակալել են Ռատի Ակակիի Խուբաշվիլիին:
Ռատի Խուվադվիլին վրացական «Դանիգի» ՍՊ ընկերություն վարորդն է։ Այժմ նրա նկատմամբ խափանման միջոց է ընտրված բացակայելու արգելքը։ Գործը մակագրվել է դատավոր Մերի Մոսինյանին։
Արաքս Մամուլյան
