14.09.2026 | 23:23
Պապիկյանի գլխավորած պատվիրակությունն աշխատանքային այցով մեկնել է Չինաստան
Ղարաբաղի հայերը չեն մոռացվի․ ԵՄ-ն 1.7 մլն եվրոյով ավելացնում է ԼՂ-ից տեղահանված հայերի մարդասիրական օգնությունը
Քաղաքականություն
31.10.2023 | 18:41
Եվրահանձնաժողովը 1,7 մլն եվրոյով ավելացնում է իր մարդասիրական ֆինանսավորումը՝ ի պատասխան Լեռնային Ղարաբաղից Հայաստան մարդկանց զանգվածային հոսքի։ Տարածված հաղորդագրության մեջ նշվում է, որ նոր ֆինանսավորումը նպատակաուղղված կլինի է՛լ ավելի ամրապնդելու ԵՄ գործող մարդասիրական արձագանքը տեղահանվածներին՝ տրամադրելով դրամական օգնություն, ապաստան, պարենային ապահովություն և ապրուստի, պաշտպանության և առողջության միջոցներ:
Այս ֆինանսավորումը համալրելու է Եվրահանձնաժողովի կողմից ճգնաժամին ի պատասխան արդեն իսկ հայտարարված 10,45 միլիոն եվրոյի օգնությունը, ինչը 2023 թվականին մարդասիրական ընդհանուր ֆինանսավորումը կհասցնի ավելի քան 12 միլիոն եվրոյի:
«Ղարաբաղի հայերը չեն մոռացվի։ Քանի որ ձմեռ է սկսվում, Հայաստանում տեղահանվածները կբախվեն լրացուցիչ մարտահրավերների։ ԵՄ-ն ավելացնում է իր մարդասիրական ֆինանսավորումը՝ ձմռանը նախապատրաստվելու համար: Մենք շարունակում ենք տեղում աշխատել մեր հումանիտար գործընկերների հետ՝ ամենախոցելի խավերին օգնություն տրամադրելու համար»,- ասել է Ճգնաժամային կառավարման հարցերով հանձնակատար Յանեզ Լենարչիչը։
Ըստ հաղորդագրության՝ քանի որ ավելի քան 100,000 մարդ լքել է իրենց տները՝ իրենց հետ վերցնելով հիմնականում նվազագույն իրեր, նրանք այժմ ունեն սննդի, ապաստանի և այլ անհրաժեշտ ծառայությունների կարիք, երբ փորձում են հաստատվել Հայաստանում: Սպասվում է, որ մարդկանց կարիքները կավելանան մոտալուտ ձմռան լույսի ներքո, քանի որ կարիքավոր մարդիկանց համար կպահանջվի ձմեռային ապաստան և տաք հագուստ:
Էմմա Չոբանյան
