Եվրոպայի խորհուրդը միջոցառումների փաթեթ է պատրաստում՝ ԼՂ-ից փախստականներին ընդունած ՀՀ-ին աջակցելու նպատակով

Եվրոպայի խորհուրդը պատրաստում է համապարփակ պատասխան փաթեթ Հայաստան փախստականների հոսքին՝ միգրացիայի և փախստականների հարցերով հատուկ ներկայացուցիչ Լեյլա Քայաջիկի այցից հետո, որը տեղի է ունեցել 2023 թվականի հոկտեմբերի 11-ից 13-ը։

Նշվում է, որ փաթեթի նպատակն է աջակցել Հայաստանին՝ վերջին շաբաթների ընթացքում ավելի քան 100,000 Ղարաբաղի հայերի, այդ թվում՝ մոտ 30,000 երեխաների հյուրընկալելու հետ կապված խնդիրների լուծման հարցում:

Քայաջիկը Հայաստան այցի ընթացքում համագործակցել է համապատասխան պետական մարմինների, միջազգային գործընկերների և հասարակական կազմակերպությունների հետ: Նա նաև այցելել է Արտաշատի քաղաքապետարանի տրամադրած երկու ապաստարաններ։ Պաշտոնյան մատնանշել է աջակցության կոնկրետ ոլորտներ, որոնք ներառված են Հայաստանի համար Եվրոպայի խորհրդի Գործողությունների ծրագրում (2023-2026) ու Միգրացիայի և ապաստանի համատեքստում խոցելի անձանց պաշտպանության գործողությունների ծրագրում (2021-25)։

Այդ ամենը ներառում է խոցելի իրավիճակներում փախստականների մարդու իրավունքների պաշտպանության ուժեղացում՝ ՆԳՆ Միգրացիայի և քաղաքացիության ծառայությանն ու Մարդու իրավունքների պաշտպանի գրասենյակին տրամադրվող անմիջական աջակցությամբ, մասնավորապես, խոցելիության գնահատման, ծառայությունների հասանելիության և փախստականների իրազեկվածության բարձրացման վերաբերյալ, առողջապահության և հոգեկան խնամքի, ներառյալ՝ հոգեբանական աջակցության հասանելիությունը հեշտացնելը, խոցելի մարդկանց հետ աշխատող մասնագետների կարողությունների հզորացումը, կրթական ներառականությանն անդրադարձը և մասնագիտական ուսումնական ծրագրերի վերանայումը, երեխաների իրավունքների պաշտպանությունը, տեղական իշխանությունների ճկունության բարձրացումը։

«Այս թիրախավորված փաթեթի միջոցով մենք կաջակցենք մեր անդամ պետությանը՝ Հայաստանին և նրա ժողովրդին, քանի որ նրանք բախվում են այս աննախադեպ դժվարություններին և մարտահրավերներին»,- հայտարարել է ԵԽ գլխավոր քարտուղար Մարիա Պեյչինովիչ Բուրիչը։

Էմմա Չոբանյան