15.11.2024 | 21:45
Բրիտանիայի խորհրդարանում Ադրբեջանում բռնաճնշումների և քաղբանտարկյալների խնդիրն է քննարկվել
«Ես հրահանգի խնդիր չեմ ունեցել. գործն ինձ համար ամբողջությամբ բացահայտված է». Ջհանգիրյանը՝ Վարդազարյանի կողմից իրեն գաղտնալսելու մասով վարույթի մասին
Հասարակություն
27.10.2023 | 14:26
«Գործն ինձ համար ամբողջությամբ բացահայտված է։ Ես հրահանգի խնդիր չեմ ունեցել»,- այս մասին լրագրողների հետ զրույցում ասաց Բարձրագույն դատական խորհրդի նախկին նախագահ Գագիկ Ջհանգիրյանը՝ անդրադառնալով ԲԴԽ նախկին նախագահ Ռուբեն Վարդազարյանի կողմից իրեն գաղտնալսելու մասով քրեական վարույթին.
«Այս պահին նախաքննությունն անջատված մասով վերսկսվել է։ Հիմա ոչ ոք չի խոչընդոտում, իրավիճակը նպաստավոր է, սպասենք նախաքննության ավարտին»,- նշեց Ջհանգիրյանը՝ չանդրադառնալով լրագրողների այն հարցին, թե արդյո՞ք ժամանակին խոչընդոտողներ եղել են։
ԲԴԽ նախկին նախագահը խուսափեց նաև գործի մասով որևէ կարծիք և դիրքորոշում հայտնել՝ պատճառաբանելով, թե այս փուլում իր կողմից սխալ կլինի նման քայլը.
«Դա կարող են դիտարկել միջամտություն և գնահատական նախաքննությանը։ Բացի այդ, ես նախաքննության տվյալները չգիտեմ»։
Հիշեցնենք՝ 2022 թվականի հունիսի 20-ին Ռուբեն Վարդազարյանը հրավիրած ասուլիսում աղմկահարույց ձայնագրություն էր հրապարակել, ըստ որի՝ ԲԴԽ նախագահի պաշտոնակատար Գագիկ Ջհանգիրյանը փորձել է պարտադրել Վարդազարյանին հրաժարական տալ։ Զրույցը տեղի է ունեցել ընթրիքի սեղանի շուրջ, որին ներկա են եղել ոչ միայն Վարդազարյանն ու Ջհանգիրյանը, այլ նաև ԲԴԽ նախկին անդամ Ստեփան Միքայելյանը։ Հրապարակված ձայնագրությունից հետևում էր, որ Վարդազարյանին վարչապետի անունից առաջարկվել է հրաժարական տալ, իսկ Ջհանգիրյանն էլ ստանձնել է միջնորդի դեր՝ երաշխավորելով, որ նրա նկատմամբ հետապնդումներ չեն իրականացվի, եթե հրաժարական ներկայացնի։
Ավելի ուշ Գագիկ Ջհանգիրյանը Հանրային հեռուստաընկերության եթերում խոստովանել էր, որ բանակցություններ իսկապես վարել է Վարդազարյանի հետ՝ հրաժարական տալու համար։
Ավելին, հայտարարել է, որ ԲԴԽ նախագահին հրաժարական պարտադրելն այնքան էլ հեշտ գործ չէ ու ինքը հոգեբանական հնարքներ է կիրառել, «կուտ» տվել։
Աղմկահարույց ձայնագրությունից օրեր անց հայտարարվեց, թե Ջհանգիրյանն ունի առողջական խնդիրներ և ենթարկվել է վիրահատության։ Հուլիսի 1-ին արդեն պարզ դարձավ, որ Ջհանգիրյանը հրաժարականի դիմում է ներկայացրել։
ՀՀ քննչական կոմիտեում նշված ձայնագրության կապակցությամբ նախապատրաստված նյութերով նախաձեռնվել էր քրեական վարույթ, որը դեկտեմբերին կարճվել է՝ հանցանքի բացակայության հիմքով։ Նշված որոշման դեմ Վարդազարյանը բողոք էր ներկայացրել, սակայն, մինչ բողոքը կստացվեր, ՀՀ գլխավոր դատախազի տեղակալ Արթուր Պողոսյանը սեփական նախաձենությամբ վերացրել էր քննիչի որոշումը՝ ըստ քննչական ենթակայության գործը Հակակոռուպցիոն կոմիտե ուղարկելու որոշում կայացնելով։ Միևնույն ժամանակ դատախազն արձանագրել է, որ նախաքննության ավարտ հայտարարելուց հետո ժամկետները չեն պահպանվել, քանի որ ավարտ հայտարարելու մասին տեղեկացնելուց հետո քննիչը ժամանակ չի տրամադրել բողոքարկման համար: Վարույթը Հակակոռուպցիոն կոմիտե տեղափոխվելուց հետո փաստացի սառեցված վիճակում պահվել է երեք ամիս, ապա՝ կարճվել հանցանքի բացակայության հիմքով։
Գործի վարույթը կարճելու որոշումը դատական կարգով վիճարկվել է։ Արդյունքում, Հակակոռուպցիոն դատարանը՝ դատավոր Մերի Մոսինյանի նախագահությամբ, բավարարել է Վարդազարյանի ներկայացուցիչների բողոքը՝ վերացնելով գործի վարույթը կարճելու որոշումը։ Դատական ակտը չի վիճարկվել ո՛չ դատախազության, ո՛չ քննիչի կողմից, ըստ այդմ, դատական ակտն օրինական ուժի մեջ է մտել։ Այժմ վարույթը վերսկսվել է։
