ԱՄՆ Պետքարտուղարությունը՝ Թեհրանում «3+3» ձևաչափով հանդիպման մասին

Վաշինգտոնը ողջունում է Հարավային Կովկասում խաղաղության համար ցանկացած բարեխիղճ ներգրավվածություն, սակայն Իրանի ու ՌԴ մեջ վստահելի գործընկերներ չի տեսնում․ այսպես է ԱՄՆ Պետքարտուղարության մամուլի ծառայության ղեկավար Մեթյու Միլլերը մեկնաբանել Իրանում երեկ կայացած «3+3» ձևաչափով հանդիպումը։
«Ինչ վերաբերում է Հայաստան-Ադրբեջան հարցին, մենք ողջունում ենք ցանկացած բարեխիղճ ներգրավվածություն, որը նպաստում է Հարավային Կովկասի ժողովուրդների խաղաղությանն ու կայունությանը՝ անկախ նրանից, թե որտեղ են տեղի ունենում այդ բանակցությունները կամ ով է ընդունում դրանք։ Ասվածով հանդերձ, մենք ընդունում ենք նաև Իրանի և Ռուսաստանի համար Հարավային Կովկասի նուրբ աշխարհագրական դիրքը, սակայն այդ երկրների մեջ մենք վստահելի գործընկերներ չենք գտել խնդիրները հասկանալու համար»,- հավելել է նա:

Հիշեցնենք՝ հոկտեմբերի 23-ին Թեհրանում ՀՀ արտաքին գործերի նախարար Արարատ Միրզոյանն իրանական կողմի հրավերով մասնակցել է տարածաշրջանային խորհրդակցական հարթակի («3+3») ձևաչափով հանդիպմանը, որին մասնակցում էին նաև Իրանի, Ռուսաստանի, Ադրբեջանի և Թուրքիայի արտաքին գործերի նախարարները: Հանդիպմանը ՀՀ ԱԳ նախարար Արարատ Միրզոյանը նշել է, որ կան խնդիրներ, շատ բարդ խնդիրներ, կա պատմություն, և այդ խնդիրները պետք է հասցեագրվեն, այլապես տարածաշրջանը դատապարտված կլինի ընդմիշտ մնալ անցյալում։ Թեհրանը դեմ է Հարավային Կովկասում օտար ուժերի ներկայությանը։ Այս մասին հայտարարել է Իրանի արտաքին գործերի նախարար Հոսեյն Ամիր Աբդոլլահիանը՝ ելույթ ունենալով «3+3» տարածաշրջանային խորհրդատվական հարթակի նախարարական հանդիպման ժամանակ։ Ռուսաստանը դեմ չէ որևէ շփումների, որոնք օգտակար են համարում և՛ հայերը, և՛ ադրբեջանցիները, սակայն սահմանազատման համար անհրաժեշտ քարտեզները ՌԴ-ում են։ Այս մասին Թեհրանում «3+3» ձևաչափով հանդիպման ավարտին հայտարարել է ՌԴ ԱԳՆ ղեկավար Սերգեյ Լավրովը։ Կովկասյան տարածաշրջանում կայունության ապահովումը հնարավոր է Ադրբեջանի և Հայաստանի միջև խաղաղության պայմանագրի կնքմամբ։ Այս մասին հայտարարել է Թուրքիայի արտգործնախարար Հաքան Ֆիդանը Թեհրանում։