Քաղաքականություն
22.10.2023 | 13:30
Ադրբեջանի, Հայաստանի, Ռուսաստանի, Թուրքիայի և Իրանի ԱԳ նախարարների հանդիպումը «3+3» ձևաչափով կկայանա վաղը՝ Թեհրանում․ հայտնում է իրանական IRNA գործակալությունը։
Նշվում է, որ տարածաշրջանային խնդիրներից և համագործակցության ընդլայնման հնարավորություններից զատ, հանդիպմանը կքննարկվեն նաև Ադրբեջանի և Հայաստանի միջև խաղաղ բանակցությունները։
Ըստ աղբյուրի տեղեկատվության՝ ստացվում է, որ այս անգամ նույնպես Վրաստանը չի մասնակցի։
Պաշտոնական Երևանից հանդիպմանը մասնակցելու վերաբերյալ հստակ հաստատում չի հնչեցվել։ Հոկտեմբերի 10-ին Հանրային հեռուստաընկերությանը տված հարցազրույցում վարչապետ Նիկոլ Փաշինյանը հայտարարել էր, որ Հայաստանը պատրաստ է «3+3» ձևաչափով հանդիպումներին՝ ընդգծելով, որ Երևանը նաև կարևորում է այդ ֆորմատում աշխատանքը։ Իսկ ԱԳ փոխնախարար Վահան Կոստանյանը հոկտեմբերի 20-ին լրագրողների հետ զրույցում հայտնել էր, որ Թեհրանից ստացել են հրավերը, իրանական կողմի հետ քննարկումներ են տեղի ունենում, երբ վերջնական որոշում լինի, կհայտարարեն։
Հիշեցնենք, որ «3+3» ձևաչափով առաջին հանդիպումը տեղի է ունեցել 2021 թվականի դեկտեմբերին՝ Մոսկվայում՝ ԱԳ փոխնախարարների մակարդակով, առանց Վրաստանի մասնակցության։
