Հասարակություն
19.10.2023 | 18:19
Վերաքննիչ քրեական դատարանը՝ նախագահությամբ դատավոր Մհեր Արղամանյանի, Հայաստանի երկրորդ նախագահ Ռոբերտ Քոչարյանի որդուն՝ Լևոն Քոչարյանին մեկ ամսով կալանավորելու որոշման դեմ նրա պաշտպանների բողոքը մերժել է։ Մերժվել է նաև Դատախազության բողոքը, որով դատախազը պահանջում էր Քոչարյանին ոչ թե մեկ, այլ երկու ամսով կալանավորել։
Այս մասին Factor.am-ի հետ զրույցում ասաց Քոչարյանի պաշտպաններից Ալեքսադր Կոչուբաևը։
Նշենք, որ Լևոն Քոչարյանը ձերբակալվել է սեպտեմբերի 22-ին, ապա՝ սեպտեմբերի 25-ին՝ կալանավորվել։
Նա մեղադրվում է Կառավարության շենքի դիմաց վարչապետ Նիկոլ Փաշինյանի հրաժարականի պահանջով ցույցերից մեկի ժամանակ իշխանության ներկայացուցիչ հանդիսացող ոստիկանների նկատմամբ բռնություն գործադրելու համար, մեղադրանքը չի ընդունում․ պնդում է, որ ոստիկաններն են իր նկատմամբ բռնություն գործադրել։
Քոչարյանին կալանավորելու որոշման դեմ վերաքննիչ բողոք էին ներկայացրել նրա պաշտպանները։ Մինչ դատավոր Մհեր Արղամանյանը կկայացներ բողոքի վերաբերյալ որոշումը՝ Քոչարյանի գործով վարույթն իրականացնող մարմինը՝ Քննչական կոմիտեն, դատարան է ներկայացրել նրա կալանքի ժամկետը ևս երկու ամսով երկարացնելու միջնորդություն, որը Երևանի քրեական դատարանի դատավոր Մասիս Մելքոնյանն այսօր բավարարել է։
Արաքս Մամուլյան
