15.09.2026 | 11:52
«Ապրելու երկիր»-ը հայտարարում է՝ կմասնակցի առաջիկա ՏԻՄ ընտրություններին
Գևորգ Ալթունյանը կալանավորվել է
Հասարակություն
17.10.2023 | 10:04
Պն լրատվական վարչության նախկին ղեկավար Գևորգ Ալթունյանը հոկտեմբերի 12-ին կալանավորվել է: Այս մասին Factor.am-ի հետ զրույցում ասաց նրա պաշտպան Գոռ Սաղոյանը:
Ալթունյանը մեղադրվում է ՊՆ գնումների փաստաթղթերում կեղծ տեղեկություններ զետեղելու եղանակով պետությունից 106 մլն 300 հազար դրամ հափշտակելու մեջ: Նա մեղադրանքը չի ընդունում:
Ալթունյանին մեղադրանք ներկայացնելուց հետո վարույթն իրականացնող մարմինը միջնորդություն է ներկայացրել` խափանման միջոցը կալանավորումն ընտրելու վերաբերյալ, սակայն դատարանը կիրառել է տնային կալանք և գրավ:
Առաջին ատյանի դատարանի այս որոշման դեմ Դատախազությունը վերաքննիչ բողոք է ներկայացրել, որը հոկտեմբերի 12-ին բավարարվել է` Ալթունյանի նկատմամբ կիրառված «տնային կալանք» և «գրավ» խափանման միջոցները փոխվել են կալանավորմամբ: Նույն օրը` հոկտեմբերի 12-ին Ալթունյանը վերցվել է արգելանքի:
Պաշտպան Սաղոյանն ասաց, որ այս պահին Վերաքննիչ քրեական դատարանի որոշման դեմ բողոք չեն ներկայացրել:
Նշենք, որ գործով, որով մեղադրյալի կարգավիճակ ունի Գևորգ Ալթունյանը, մեղադրյալ է ևս 4 անձ:
Արաքս Մամուլյան
