Բրյուսովի համալսարանի պրոռեկտորի ու ամբիոնի վարիչի գործով վարույթ է նախաձեռնվել թմրամիջոց իրացնելու հոդվածով․ պրոռեկտորը պնդում է՝ իրենց մոտ թմրանյութ չի եղել

Վալերի Բրյուսովի անվան լեզվաբանական համալսարանի աշխատակազմի կառավարման և տնտեսական հարցերով պրոռեկտոր Սահակ Մանուկյանին ու վերջինիս ընկեր, նույն համալսարանի ամբիոններից մեկի վարիչի պաշտոնակատար Հակոբ Մադոյանին այսօր գիշերը պարեկային ծառայությունը տարել է Ոստիկանություն՝ թմնրանյութ պահելու կասկածանքով։ Սահակ Մանուկյանը Factor.am-ի հետ զրույցում պատմեց, որ ընկերոջ հետ Նոր Նորքում են եղել, իր ինքնազգացողությունը վատացել է, ընկերոջը խնդրել է կանգնել, մեքենայից իջել են, հետո ինքը տեսել է, որ ընկերոջը ձերբակալում են։ Ըստ պարեկների՝ Մանուկյանի ընկերոջ մոտ թմրամիջոց է եղել, որը վերջինս գցել է գետնին։

Մանուկյանի խոսքով՝ հետո իրենց տարել են ոստիկանություն, ենթարկել անձնական խուզարկության ու ոչինչ չեն հայտնաբերել և 6 ժամ պահելուց հետո իրենց ազատ են արձակել։

Քննչական կոմիտեի մամուլի խոսնակ Գոռ Աբրահամյանը մեզ հետ զրույցում ասաց, որ դեպքի առթիվ քրեական վարույթ է նախաձեռնվել Քրեական օրենսգրքի 393-րդ հոդվածի 1-ին մասով (իրացնելու նպատակով թմրամիջոց, հոգեմետ (հոգեներգործուն) նյութ, դրանց պատրաստուկ կամ դրանց համարժեք նյութ (անալոգ) կամ դրանց ածանցյալ ապօրինի արտադրելը, պատրաստելը, վերամշակելը, ձեռք բերելը, պահելը, տեղափոխելը, առաքելը, տարածելը, գովազդելը կամ դրանք ապօրինի իրացնելը կամ մեկ ուրիշի դրդմամբ՝ նրա համար թմրամիջոց, հոգեմետ (հոգեներգործուն) նյութ, դրանց պատրաստուկ կամ դրանց համարժեք նյութ (անալոգ) կամ դրանց ածանցյալ ապօրինի ձեռք բերելը` պատժվում է ազատազրկմամբ՝ երեքից վեց տարի ժամկետով): Աբրահամյանը նաև նշեց, որ հայտնաբերված 3 փաթեթի պարունակությունը պարզելու համար նշանակվել է փորձաքննություն։ Վարույթն իրականացնող Քննչական կոմիտեն ոստիկանությանը հանձնարարություն է տվել վերը նշված անձանց ներկայացնել Կոմիտե։

Արաքս Մամուլյան