«Վահե Ղազարյանը խախտում է արել, վարչապետը պետք է պատասխանատվության ենթարկի»․ Լևոն Բարսեղյան

Այսօր հայտնի դարձավ, որ Վահե Ղազարյանի ղեկավարած Ներքին գործերի նախարարության ոստիկանությունը տուգանել է երեկ քաղաքապետ դարձած Տիգրան Ավինյանին։

Նա տուգանվել է «Գազել» վարելու համար, քանի որ համապատասխան կարգի վարորդական իրավունք չի ունեցել։ Երթուղայինը վարելու տեսանյութը հրապարակվելուց հետո Factor.am-ը դեռևս օգոստոսի 15-ին Վահե Ղազարյանից, որն, ի դեպ, Նիկոլ Փաշինյանի ընկերն է, գրավոր հարցմամբ հետաքրքրվել էլ էր՝ արդյոք Ավինյանի արարքը երթևեկության կանոնների խախտում չէ, և ոստիկանությունն ի՞նչ քայլեր է ձեռնարկել։

Ներքին գործերի նախարարությունը, սակայն, Factor TV-ի գրավոր հարցմանն այդպես էլ պատասխան չի տվել։ Մենք բազմիցս հետաքրքրվել ենք հարցման պատասխանի ճակատագրով և մշտապես ստացել ենք նույն պատասխանը՝ «պատասխանի տրամադրումն ընթացքի մեջ է», այնինչ «Տեղեկատվության ազատության մասին» ՀՀ օրենքով սահմնաված թե՛ հնգօրյա, թե՛ 30-օրյա ժամկետները վաղուց լրացել են։ Նշենք, որ հարցումից երկու ամիս անց էլ Վահե Ղազարյանը մեր հարցմանը չի պատասխանել, և հանկարծ պարզ է դառնում, որ Ավինյանը տուգանվել է։

Գյումրիի Ժուռնալիստների «Ասպարեզ» ակումբի խորհրդի նախագահ Լևոն Բարսեղյանը Factor.am-ի հետ զրույցում նշեց, որ Վահե Ղազարյանը օրենք է խախտել, իսկ նրա գործելաոճը չի բխում հեղափոխական իշխանության տրամաբանությունից։

«Հաշվի առնելով, որ ոստիկանությունը հեղափոխությունից առաջ, գոնե ժամկետների մեջ պատասխանում էր, իսկ հիմա, փաստորեն, խախտում է ժամկետը, ենթադրենք, որ սա տեղափոխվում է հենց հեղափոխական կառավարության տրամաբանության մեջ։ Այսինքն, եթե հեղափոխությունից պետք է բան փոխված լիներ, արդեն փոխվել է, ցավոք, դեպի վատը։ Նախկինում բոլոր հարցումներին գոնե ժամկետի մեջ պատասխանում էին։ Հիմա կառավարությունն՝ ի դեմս այդ նախարարի, որոշել է, որ երկու ամիս կարող է չպատասխանել։ Սա «Տեղեկատվության ազատության մասին» ՀՀ օրենքի 9-րդ հոդվածի պահանջի խախտում է, որը թույլ է տվել ՆԳ նախարարը։ Խախտվել է ձեր տեղեկատվական ազատության իրավունքը, ինչը վարչական իրավախախտում է, որի համար պետք է պաշտոնյային վարչական պատասխանատվության ենթարկի նրա վերադասը՝ վարչապետը»,-ասաց Լևոն Բարսեղյանը։

Տիգրան Ավինյանը ՔՊ վարչության անդամ է, իսկ խատումը կատարել է, երբ արդեն հայտնի էր, որ իշխող ուժի քաղաքապետի թեկնածուն է։ Լևոն Բարսեղյանից հետաքրքրվեցինք՝ որքանո՞վ այս հանգամանքը կարող էր կաշկանդել ՆԳՆ-ին, որպեսզի նախընտրական փուլում չտրամադրեին այնպիսի պատասխան, որտեղ նշված կլիներ, որ Տիգրան Ավինյանը խախատում է կատարել և տուգանվել է։

«Ողջախոհությունը հուշում է, որ եթե հարցումը վերաբերում է համայնքի ղեկավարի թեկնածուին՝ այն էլ իշխող ուժի, ՆԳ նախարարը կամ տեղեկատվությունը տնօրինողը, առավել ևս ժրաջանորեն պետք է պատասխաներ, ոչ թե պետք է սպասեր հինգ օրը լրանալուն, այլ պետք է երկրորդ օրը պատասխաներ»,-ասաց Լևոն Բարսեղյանը։

Նշենք, որ Վահե Ղազարյանը, ի հեճուկս Նիկոլ Փաշինյանի այն պնդումներին, թե իրենց կառավարության պաշտոնյաները հաշվետու են քաղաքացիներին, երբևէ, ո՛չ ոստիկանապետի, ո՛չ նախարարի պաշտոնում լրագրողների հետ չի հաղորդակցվել։

Նարեկ Կիրակոսյան