19.02.2026 | 10:06
«Ինտերը» պարտությամբ է մեկնարկել Չեմպիոնների լիգայի փլեյ-օֆֆում. ՏԵՍԱՆՅՈՒԹ
Հայաստանը 30 տարում Արցախին տրամադրել է 1 տրլն 154 մլրդ դրամ բյուջետային վարկ․ 2018թ․ հետո վարկերի ծավալները տարեցտարի ավելացել են
05.10.2023 | 20:30
Հայաստանի Հանրապետությունը պետական բյուջեից 1 տրլն 154 մլրդ 59 մլն 174 հազար 844 դրամ վարկ է տրամադրել Լեռնային Ղարաբաղին։ Այս մասին Factor.am-ի հարցմանն ի պատասխան՝ հայտնեցին ՀՀ Ֆինանսների նախարարությունից։
Լեռնային Ղարաբաղին բյուջետային վարկեր տրամադրվել են յուրաքանչյուր տարվա «ՀՀ պետական բյուջեի մասին» ՀՀ օրենքների հիման վրա՝ օրենքների համապատասխան հոդվածներով սահմանված վարկի տրամադրման պայմաններով: ՀՀ պետական բյուջեից Լեռնային Ղարաբաղին տրամադրվող բյուջետային վարկի չափը որոշվել է յուրաքանչյուր տարվա բյուջետային գործընթացի շրջանակում՝ ելնելով կանխատեսվող բյուջետային մուտքերի մակարդակից և ծախսերի առաջնահերթությունից:
Առաջին անգամ Արցախին բյուջետային վարկ հատկացվել է 1993 թվականին։ Հաջորդ 25 տարիների ընթացքում, ներառյալ՝ 2018 թվականը, բյուջետային վարկերի ընդհանուր չափը կազմել է 573 մլրդ 75 մլն դրամ։
Նկատենք, որ 2018 թվականից հետո վարկերի ծավալները տարեցտարի ավելացել են, մասնավորապես՝ 2018 թվականին՝ 51․4 մլրդ դրամ, 2019-ին՝ 57․8 մլրդ, 2020-ին՝ 75․1 մլրդ, 2021-ին՝ 128․7 մլրդ, 2022-ին՝ 176 մլրդ դրամ։ 2023 թվականի վարկը մասամբ է փոխանցվել․ սահմանվել էր 156․4 մլրդ, սակայն փաստացի հունվարից սեպտեմբեր ամիսը ներառյալ հատկացվել է 143․3 մլրդ դրամ, 4-րդ եռամսյակում մնացորդը 13․1 մլրդ է:
2020 թվականի 44-օրյա պատերազմից հետո Արցախում տուժած քաղաքացիների համար իրականացված տարբեր ծրագրերի համար ՀՀ բյուջեից հատկացվել է մոտ 63․3 մլն դրամ, այդ թվում՝ 2020 և 2021 թվականներին՝ միանվագ դրամական օգնություն Արցախում հաշվառված քաղաքացիներին 34․5 մլն, Ադրբեջանի վերահսկողության տակ անցած տարածքներում հաշվառված քաղաքացիներին՝ 13 մլն, ռազմական դրությամբ պայմանավորված՝ աջակցություն Արցախի բնակչությանը 12․6 մլն դրամ և այլն։
Գայանե Խաչատրյան
