Քաղաքականություն
03.10.2023 | 14:52
Կոնգրեսի ճնշումը՝ նախագահ Բայդենի վարչակազմի վրա՝ դադարեցնելու ԱՄՆ-ի մեղսակցությունը Արցախի 120,000 բնիկ հայ քրիստոնյաների նկատմամբ Ադրբեջանի էթնիկ զտմանը, այս շաբաթ ավելացել է 75 կոնգրեսականների նամակով: Ներկայացուցիչների պալատի անդամները կոչ են անում վարչակազմին պատժամիջոցներ սահմանել Ադրբեջանի դեմ և կիրառել 907-րդ հոդվածի սահմանափակումները Ալիևի ցեղասպան ռեժիմին ԱՄՆ ռազմական օգնության վերաբերյալ, հաղորդում է Ամերիկայի Հայ դատի հանձնախումբը (ANCA):
Կոնգրեսի վերջին նամակում, որը գլխավորում են խոսնակ Նենսի Փելոսին (D-CA) և կոնգրեսական Աննա Էշուն (D-CA), օրենսդիրների երկկուսակցական խումբը դատապարտել է Ադրբեջանի «չհրահրված ռազմական հարձակումը» և Արցախի «դաժան իննամսյա շրջափակումը», ինչը «տարածաշրջանի հայ բնակչությանն այլ տարբերակ չի թողել, քան փախչել՝ վախենալով իրենց ապագայի համար Ադրբեջանի դաժան ավտորիտար կառավարման ներքո»։
«Ակնհայտ է, որ մեր երկրի արձագանքն այս ճգնաժամին համարժեք չի եղել ավերածությունների մասշտաբին։ Մենք կարծում ենք, որ Միացյալ Նահանգները պետք է հստակեցնի Ադրբեջանին՝ Արցախի դեմ իր չհրահրված ագրեսիան անընդունելի է և կարժանանա համապատասխան պատասխանի»,- հայտարարել են ԱՄՆ Կոնգրեսի ներկայացուցիչները։
Օրենսդիրները նշել են, որ «այս կանխարգելելի մարդասիրական աղետը տեղի է ունենում մեր աչքի առաջ»՝ չնայած վայրագությունների կանխարգելմանն ուղղված գիտնականների ջանքերին, որոնք ահազանգում են Արցախի ցեղասպանության մասին։
Օրենսդիրներն առաջարկել են երեք կոնկրետ գործողություն, որոնք Բայդենի վարչակազմը պետք է ձեռնարկի՝ «վերջ տալու այս անհարկի տառապանքներին և հավաստիացնի, որ Ադրբեջանը կբախվի էթնիկ զտումների հետևանքների հետ»:
Այդ գործողությունները ներառում են՝
1) Կիրառել Ազատության Աջակցության ակտի 907-րդ բաժինը՝ գործող օրենքի դրույթ, որն արգելում է ԱՄՆ ռազմական օգնությունն Ադրբեջանին, և կիրառում է անհատական պատժամիջոցներ Ադրբեջանի պաշտոնյաների նկատմամբ՝ «Մագնիտսկու ակտի» համաձայն՝ Ադրբեջանին հասկացնելու համար, որ իր ագրեսիան չի հանդուրժվելու:
2) Տրամադրել հզոր մարդասիրական օգնություն՝ աջակցելու Արցախից տեղահանված բնակչությանը և համախմբել միջազգային հանրությանը նույնն անելու համար՝ առաջնորդելով միջազգային մարդասիրական օգնության ստեղծմանը։
3) Ձեռնարկել բոլոր անհրաժեշտ քայլերը՝ ապահովելու Արցախի բնակչության անվտանգ տարհանումը Հայաստան՝ ներառյալ դիտորդների անհապաղ տեղակայումը Լաչինի միջանցքում, ինչպես նաև անմիջական ներգրավվածություն Ադրբեջանի իշխանությունների հետ՝ համաներում ապահովելու Արցախի տեղական ղեկավարների համար։
