Տնտեսություն
01.10.2023 | 10:25
«Առևտրային բանկերն այս պահին գույքագրում են ստեղծված իրավիճակի հետևանքով առաջացած և հնարավոր այլ խնդիրները, որի արդյունքում Կառավարության և Կենտրոնական բանկի հետ գործակցությամբ անհատական կամ ընդհանուր լուծումներ կառաջարկվեն և կներկայացվեն»,- Factor.am-ին հայտնել են Կենտրոնական բանկի հասարակայնության հետ կապերի ծառայությունից՝ ի պատասխան հարցի, թե բռնի տեղահանված արցախցիների բանկային պարտավորությունների հարցը քննարկվե՞լ է, ի՞նչ ծավալի մասին է խոսքը և ի՞նչ որոշում կա։
ԿԲ-ից նշել են, որ առանձնացված վիճակագրություն չի վարվում և չեն կարող տրամադրել։
Թե ինչ է լինելու արցախյան բանկերում, մասնավորապես՝ «Արցախբանկում», քաղաքացիների ավանդների հարցը, ԿԲ-ից տեղեկացրել են, որ Արցախում բանկերի բոլոր մասնաճյուղերը ՀՀ տարածքում լիցենզավորված և գրանցված բանկերի մասնաճյուղեր են, համապատասխանաբար, քաղաքացիների սպասարկումն իրականացվում և իրականացվելու է անկախ նրանց գտնվելու վայրից:
Հիշեցնենք, որ 44-օրյա պատերազմից հետո բանկերը ներեցին Արցախի պատերազմում զոհված անձանց և նրանց հարազատների վարկերը՝ մոտ 2 մլրդ դրամի չափով:
Գայանե Խաչատրյան
