Կոռնիձորի անցակետում ողջ գիշեր չի դադարել բռնի տեղահանված արցախցիների հոսքը։ Տեղում աշխատող Factor TV-ի թղթակիցը պատմում է, որ այսօր ևս ճանապարհին հերթապահում են քաղաքացիներ, որոնք փոքրիկ փաթեթներ են փոխանցում ժամանող մեքենաներին.
«Այդ փաթեթները պատրաստվում են հենց անցակետի վրաններում։ Ժամանող մեքենաներին հարցնում են՝ արդյո՞ք մեքենայում կա սնունդ, բացասական պատասխան ստանալու դեպքում նրանց տալիս են փոքրիկ սննդի փաթեթներից, որը կբավականացնի մինչև հասնեն Գորիսի կամ Վայքի անցակետ։ Իսկ այն ընտանիքները, որոնք ժամանում են երեխաների հետ, տալիս են նաև քաղցրավենիք, ջուր և հյութ»,- մանրամասնեց մեր թղթակիցը։
Կոռնիձորի անցակետում շարունակում է մարդկանց սպասարկել նաև Տեղ համայնքի ամբուլատորիան, որի վրանի ներքո կան ճնշման չափիչ սարքեր, ջերմաչափեր և առաջին օգնության համար այլ միջոցներ։ Եթե ժամանողների ինքնազգացողությունը վատ է լինում, նրանց այստեղ առաջին օգնություն է ցուցաբերվում։
«Հիմնական խնդիրները, որոնցով մարդիկ դիմում են՝ սթրեսն է, գլխացավերը և փորլուծությունը»,- Factor TV-ի հետ զրույցում նշել է բուժաշխատող Վահրամ Ավետիսյանը։
Մանրամասները՝ տեսանյութում։
