13.12.2024 | 23:31
Գերմանիան հավանություն է տվել 2006թ․ ի վեր զենքի ամենամեծ արտահանմանը Թուրքիա
Շառլ Միշելի հայտարարությունը Գրիգորյան-Հաջիև բրյուսելյան հանդիպման վերաբերյալ
Քաղաքականություն
26.09.2023 | 18:51
Եվրոպական խորհրդի նախագահ Շառլ Միշելի խոսնակը հայտարարություն է տարածել Բրյուսելում այսօր տեղի ունեցած ՀՀ Անվտանգության խորհրդի քարտուղար Արմեն Գրիգորյանի և Ադրբեջանի նախագահի օգնական Հիքմեթ Հաջիևի հանդիպումից։
Նշվում է, որ Շառլ Միշելի բարձր հովանու ներքո նրա դիվանագիտական խորհրդականներ Սայմոն Մորդյուն և Մագդալենա Գրոնոն հյուրընկալել են Հայաստանի Անվտանգության խորհրդի քարտուղար Արմեն Գրիգորյանի և Ադրբեջանի նախագահի արտաքին քաղաքականության հարցերով խորհրդական Հիքմեթ Հաջիևի հանդիպումը՝ Ֆրանսիայի նախագահ Մակրոնի ու Գերմանիայի կանցլեր Շոլցի խորհրդականներ Էմանուել Բոննի և Յենս Պլոետների, ինչպես նաև Հարավային Կովկասի և Վրաստանի ճգնաժամի հարցերով ԵՄ հատուկ ներկայացուցիչ Տոյվո Կլաարի մասնակցությամբ։
Նշվում է, որ կարճ ժամանակով հանդիպմանը մասնակցել է նաև Շառլ Միշելը։
Ասվում է, որ ԵՄ-ն մասնակիցներին հրավիրել է կարծիքներ փոխանակել տեղում առկա իրավիճակի և տեղի բնակչության հրատապ կարիքների լուծմանն ուղղված տարբեր ջանքերի վերաբերյալ: Եվրամիությունն ուշադիր հետևում է այս բոլոր զարգացումներին և ներգրավված է եղել ամենաբարձր մակարդակով՝ օգնելու մեղմացնել ռազմական գործողությունների ազդեցությունը խաղաղ բնակչության վրա: ԵՄ-ն այս համատեքստում կրկնել է իր դիրքորոշումն անցյալ շաբաթ Ադրբեջանի ռազմական գործողության վերաբերյալ։
Ըստ հայտարարության՝ Հիքմեթ Հաջիևը ներկայացրել է տեղի բնակչությանը մարդասիրական օգնություն և անվտանգություն ապահովելու՝ Ադրբեջանի ծրագրերը։ ԵՄ-ն ընդգծել է թափանցիկության և հասանելիության անհրաժեշտությունը միջազգային հումանիտար և մարդու իրավունքների դերակատարների համար, ինչպես նաև Բաքվի տեսլականը Ադրբեջանում Ղարաբաղի հայերի ապագայի վերաբերյալ:
Հայտարարության մեջ նշվում է նաև, որ ԵՄ-ն օգնություն է ցուցաբերում Ղարաբաղի հայերին։
Նշվում է, որ հանդիպումը թույլ է տվել մասնակիցների միջև ինտենսիվ կարծիքների փոխանակում իրականացնել 2023 թվականի հոկտեմբերի 5-ին Գրանադայում նախատեսված Եվրոպական համայնքի երրորդ գագաթնաժողովի շրջանակում առաջնորդների հնարավոր հանդիպման կարևորության վերաբերյալ:
Մասնակիցներն ի գիտություն են ընդունել Հայաստանի և Ադրբեջանի համատեղ շահագրգռվածությունը՝ օգտվելու Գրանադայում հնարավոր հանդիպումից՝ շարունակելու կարգավորմանն ուղղված իրենց ջանքերը։
Այս առումով Արմեն Գրիգորյանը և Հիքմեթ Հաջիևը բանակցություններ են վարել առաջիկա հնարավոր հանդիպումից Հայաստան-Ադրբեջան խաղաղ գործընթացն առաջ մղելու հնարավոր կոնկրետ քայլերի շուրջ, ինչպիսիք են սահմանների սահմանազատման, անվտանգության, կապի, հումանիտար հարցերի և ավելի լայն խաղաղության պայմանագրի հարցերը։
Ըստ ԵՄ-ի՝ կոնկրետ գործողություններ և վճռական փոխզիջումային լուծումներ են անհրաժեշտ նորմալացման գործընթացի բոլոր ուղիներում:
ԵՄ-ն կարծում է, որ Գրանադայում հնարավոր հանդիպումը պետք է օգտագործվի և՛ Երևանի, և՛ Բաքվի կողմից՝ հրապարակայնորեն կրկնելու իրենց հավատարմությունը միմյանց տարածքային ամբողջականությանն ու ինքնիշխանությանը՝ համաձայն Պրահայում և Բրյուսելում նախկինում ձեռք բերված պայմանավորվածությունների:
Էմմա Չոբանյան
