Եթե Հայաստանը չի ուզում միջանցք, ապա այն կանցնի Իրանով․ Էրդողան

Թուրքիայի նախագահ Ռեջեփ Թայիփ Էրդողանը Ադրբեջան կատարած իր մեկօրյա այցից վերադառնալիս ինքնաթիռում պատասխանել է լրագրողների հարցերին, գրում են թուրքական լրատվամիջոցները։

«Որպես Թուրքիա, մենք բոլոր գործընթացներում կանգնած ենք եղել Ադրբեջանի կողքին։ Անցյալ շաբաթ ՄԱԿ-ի Գլխավոր ասամբլեայում իմ ելույթում ես հատուկ ընդգծեցի մեր աջակցությունը։ Գործողության արդյունքում ամրապնդվել է Ադրբեջանի ինքնիշխանությունը ողջ Ղարաբաղի նկատմամբ։ Մենք ակնկալում ենք, որ Հայաստանը կդրսևորի ուժեղ կամք՝ գործընթացը երկարաձգելու փոխարեն։ Այս ակնկալիքը ես հայտնեցի նաև Հայաստանի վարչապետ պարոն Նիկոլ Փաշինյանին, ում հետ սեպտեմբերի 11-ին հեռախոսազրույց եմ ունեցել։ Մենք չենք տեսնում որևէ խնդիր, որը չի կարող լուծվել, եթե հարգվեն Ադրբեջանի տարածքային ամբողջականությունը, ինքնիշխանությունը և հարևանության օրենքը։ Ադրբեջան-Հայաստան գործընթացում առաջընթաց գրանցելը մեծ խթան կհաղորդի նաև տարածաշրջանային կարգավորմանը»,-ասել է Էրդողանը։

Նա նաև անդրադարձել է տարածաշրջանում հաղորդակցությունների բացմանը՝ դարձյալ  խոսելով միջանցքի մասին։

«Նախիջևանի և Ադրբեջանի այլ շրջանների հետ ցամաքային և երկաթուղային գծերով ուղիղ կապերի հաստատումը մեր հարաբերություններն ավելի կամրապնդեն։ Այդ իսկ պատճառով մենք ամեն ինչ անելու ենք, որ այս միջանցքը հնարավորինս շուտ բացվի։ Այս միջանցքի իրականացումը շատ կարևոր է Թուրքիայի և Ադրբեջանի համար, այն ռազմավարական խնդիր է և պետք է ավարտին հասցվի։ Երբ այս միջանցքը բացվի, Բաքվից դուրս եկող մեքենան կամ գնացքը կկարողանա անմիջապես Կարս գալ։ Ուրախալի է այս հարցում Իրանի կողմից դրական ազդակներ տեսնելը։ Երկաթուղին անցնում է Թուրքիայով Նախիջևան, Հայաստան ու Ադրբեջան։ Եթե Հայաստանը ճանապարհ չի տալիս, որտեղո՞վ է այն անցնում՝ Իրանով։ Իրանը հիմա դրական է նայում»,-ասել է Էրդողանը։

Նշենք, որ այս դեպքում Էրդողանը նկատի ունի  Բաքվի ու Թեհրանի միջև 2022 թ-ի մարտի 11-ին կնքված հուշագիրը, որը ենթադրում է հաղորդակցման նոր կապեր Ադրբեջանի ու Նախիջևանի միջև Իրանի տարածքով։

Էմմա Չոբանյան