«Վիտոն մնում է Արցախում, թող պարտիզանական շարժում ի՛նքը սկսի»․ Սամվել Բաբայանը Հայաստանում է

«Ոնց որ Աֆրիկա եկած լինեմ, որ զարմանում եք, իմ երկիր եմ եկել։ Լրագրողն ինձ հարցրել է՝ ե՞րբ եք գալու, պատասխանել եմ՝ սիրտս երբ ուզի, այդ օրն էլ այդտեղ եմ լինելու։ Սիրտս ուզել է, եկել եմ»,- Factor.am-ի հետ զրույցում ասաց Արցախի ՊԲ նախկին հրամանատար Սամվել Բաբայանն՝ անդրադառնալով, Հայաստան գալու մասին տեղեկություններին։

-Պարզապես այս ծանր իրավիճակում բոլորի սիրտն է ուզում գալ Մայր հայրենիք, չեն կարողանում, Դուք ինչպե՞ս հեշտությամբ եկաք։

-Վիդեոն կա «տամոժնիում» նկարած, կարող եք ասել՝ տան տեսնեք, թե ինչպես եմ անցնում։

– Չնայած ծանր իրավիճակին՝ մարդիկ Ձեզ հետ հույսեր էին կապում, որ ինչ-որ գործողություն կնախաձեռնեիք, պարտիզանական շարժում կսկսեիք․․․

– Վիտոն մնում է այնտեղ, ինքը թող  պարտիզանական շարժումը սկսի, ասել է՝ հավերժ մնում եմ այստեղ, ռուսների հետ կանեն պարտիզանական շարժումը։

– Մինչ այս Ադրբեջանը պարբերաբար հայտարարում էր, որ ձերբակալելու են արցախյան պատերազմներում առանցքային դեր ունեցողներին․ անգամ լուրեր կային, որ ցուցակ կա կազմված, Ձեր անունը չկա՞ր։

-Դա Բաքվից պետք է հարցնես, եթե ցուցակներում կայի, ինչի չեն բռնել։ Հարցրեք՝ КПП-ն ոնց էին դրել, որ Սամվել Բաբայանն անցավ, իրենք չտեսան։

-Գուցե թաքնվել եք, չե՞ն ճանաչել։

-Եթե դուք մտածում եք, որ ես կարող եմ թաքնվեմ, նոր անցնեմ, ուրեմն Ձեր գործերը լավ չեն։

-Վախ չկա՞ր, որ անցակետում Ձեզ կձերբակալեն։

-Ես ասել եմ՝ 25 տարեկանում մի անգամ վախեցել եմ, դրանով իմ վախերը պրծել են։ Վախ չունեմ։

-Պարոն Բաբայան, տեղեկություններ ենք ստանում, որ մարդիկ չեն կարողանում դուրս գալ Արցախից, բենզինի խնդիր կա։ Դուք խորհրդարանական ուժի ղեկավար եք, պարտավորություն չունե՞ք նրանց աջակցելու։

-Ո՞վ չի կարողանում․ «կալոնաները» գալիս են, ով չի կարողանում գա, թող ձեռքը բարձրացնի, ես իրեն հանեմ։

 Նարեկ Կիրակոսյան