Ինչու է Ադրբեջանը արգելափակել հայկական կայքերը

Հատկապես վերջին սահմանային միջադեպից հետո ադրբեջացիներից շատերը` զրկված լինելով օբյեկտիվ տեղեկատվություն ստանալու հնարավորությունից, օգտվում էին ադրբեջանալեզու էջեր ունեցող հայկական լրատվական աղբյուրներից, այդ թվում` Razm.info և Armradio.am կայքերից: Այսօր, սակայն, հայտնի դարձավ, որ Ադրբեջանի իշխանությունները շտապել են արգելափակել այդ կայքերի գործունեությունը երկրի տարածքում: ։ Այս առնչությամբ Factor.am-ը զրուցեց ադրբեջանագետ, Ռազմինֆոյի փորձագետ Տարոն Հովհաննիսյանի հետ․ «Առաջին անգամ չէ, որ նման տեղեկություն է հայտնվում, որ Razm.info կայքը Ադրբեջանում արգելափակվել է, իրենց մոտ առհասարակ սովորություն է արգելափակել բոլոր այն կայքերը, որոնք իրենց համար ոչ ցանկալի տեղեկություններ են տարածում»,-ասաց նա։

Մեր զրուցակիցը հիշեցրեց, որ Ադրբեջանում արգելափակված են բազմաթիվ տեղական ընդդիմադիր լրատվամիջոցներ, օրինակ` Մեյդան թիվին, նաեւ` Ազատություն ռադիոկայանի կայքը․ «Հասկանալի է, որ իրենք պետք է շահագրգռված լինեին փակեին նաև Ռազմինֆոն, որը հենց ադրբեջանական հանրության շրջանում է աշխատանքներ տանում, ուտսի իրենց տրամանաբանության տեսանկյունից որևէ արտառոց բան չկա, որ արգելափակում են կայքը։ Դա խոսում է այն մասին, որ այն ինչ անում ենք, ազդեցություն ունի, հակառակ դեպքում անիմաստ ռեսուրսը փակելու խնդիր դժվար թե ունենային»,-ներկայացրեց Հովհաննիսյանը։

Նկատենք, որ Ադրբեջանում արգելափակված է Ռազմինֆո կայքը, սակայն ֆեյսբուքյան էջը գործում է։ Ադրբեջանցի ընթերցողները, չկարողանալով մուտք գործել կայք, ֆեյսբուքյան էջում են գրում այդ մասին․ «Արգելափակման մասին ասել են տասյնակ ընթերցողներ, որոնք փորձում են մուտք գործել Ռազմինֆոյի էջ, ունենք որոշ ընթերցողներ, որոնք հետաքրքրված են տեղեկատվություն ստանալու հարցով ու երբ չեն կարողանում մուտք գործել, էջին են գրում»,-մանրամասնեց մեր զրուցակիցը։

Ադրբեջանագետի խոսքով, սակայն, տեխնիկական միջոցներն այսօր այնպիսին են, որ ցանկացողները «կարող են շրջանցել այդ արգելքները և օգտվել կայքից»։

Հովհաննիսյանը հիշեցրեց Ադրբեջանում վերջին տարիներին սահմանային վիճակի մասին ընդունված օրենքի մասին, որի համաձայն չի թույլատրվում առանց Ադրբջանի պաշտպանական գերատեսչության համաձայնության, սահմանային վիճակի վերաբերյալ տեղեկություն հրապարակել․ «Հասկականալի է, որ երբ ժամանակ առ ժամանակ սահմանային իրավիճակը սրվում է, իրենց մոտ տեղեկատվական քաղց է առաջանում, ուստի որոշ մարդիկ փորձում են այն ստանալ հայաստանյան լրատվական դաշտից»,-նշեց նա։

Սեդա Ղուկասյան