Քաղաքականություն
22.09.2023 | 01:52
Մայրաքաղաքի տարբեր փողոցներից ոստիկանական բաժիններ բերման ենթարկված 35 քաղաքացիների նկատմամբ քրեական վարույթներ չեն նախաձեռնվել։ Այս մասին տեղեկացնում է փաստաբան Զորայր Հարությունյանը։
«Երևան քաղաքի Արաբկիր, Էրեբունի ու Զեյթուն վարչական շրջանների ոստիկանության բաժիններ բերվածներն ազատ են արձակվել կամ ազատվելու ճանապարհին են: Քրեական վարույթներ չեն նախաձեռնվել, փոխարենը հարուցվել են վարչական վարույթներ»,- նշում է Հարությունյանը։
Փաստաբան Վարազդատ Հարությունյանը, որը ևս ստանձնել էր բերման ենթարկված անձանց պաշտպանությունը, ֆեյսբուքյան իր էջում գրառմամբ պնդում է, որ բերման ենթարկված և ձերբակալված գրեթե բոլոր քաղաքացիները դաժանաբար ծեծի են ենթարկվել։
Հիշեցնենք՝ սեպտեմբերի 19-ից Երևանի տարբեր հատվածներում բողոքի ակցիաներ են կազմակերպվում ընդդիմադիր հասարակական և քաղաքական գործիչների, ինչպես նաև քաղաքացիների կողմից, որոնց թվում կան Հայաստանում գտնվող արցախցիներ։ Այսօր ակցիայի մասնակիցներն ամբողջ օրվա ընթացքում փակել են մայրաքաղաքի կենտրոնական փողոցները։ Ակցիաների ընթացքում իրավապահների կողմից բռնի ուժով բերման են ենթարկվել ոստիկանության տարբեր բաժիններ։
