Զախարովան մոռացե՞լ է, թե ով Է Ադրբեջանի զենքի գլխավոր մատակարարը․ ԵզրաԿԱՑՈՒԹՅՈՒՆ

ՌԴ ԱԳՆ պաշտոնական ներկայացուցիչ Մարիա Զախարովան, ամենշաբաթյա ճեպազրույցում խոսելով հայ-ամերիկյան զորավարժությունների մասին, դժգոհել էր հայ-ամերիկյան գործակցությունից՝ որպես փաստարկ նշելով այն, որ Վաշինգտոնի մատակարարված զենքերից Ռուսաստանի քաղաքացիներ են սպանվում։   

«Մենք խնդհարույց հարցերի շուրջ մեր բոլոր մտահոգությունները հասցնում ենք այն կողմին, ում մենք ունենք հարցեր։ Մասնավորապես, Դուք հիմա խոսում էիք Թուրքիայի մասին, մենք նրանց հետ ուղիղ քննարկում ենք այդ հարցերը։ Հիմա՝ հայ-ամերիկյան զորավարժությունների մասին։ Գիտեք՝ հարկավոր է հիշել և ուշադրություն դարձնել Վաշինգտոնի թշնամական գծին մեր երկրի հանդեպ։ Դա գործոն է։ Վաշինգտոնը ոչ միայն տեսականորեն է խոսում այն մասին, որ ցանկանում է ռազմավարական պարտության մատնել Ռուսաստանին, այլ դա իրականացնում է գործնականում։ Դա՝ մեկ։ Մատակարարում է սպառազինություն, որով սպանում են մեր քաղաքացիներին։ Դա շատ կարևոր է։ Այդ երբվանի՞ց անցաք ազգությանը։ Իսկ դուք հասկանո՞ւմ եք, որ մեր երկրի տարածքում՝ մեր քաղաքներում, այդ թվում՝ այնտեղ, որտեղ կիրառվում են այդ ամերիկյան զենքերը, նաև հայեր են ապրում»,- ասել էր Զախարովան՝ պատասխանելով «Վերելք» տեղեկատվական-վերլուծական կենտրոնի խմբագիր Հայկ Խալաթյանի հարցին։

Այս հայտարարությունն ուշագրավ է նրանով, որ ՌԴ ԱԳՆ պաշտոնական ներկայացուցիչը կամ չի հիշում, կամ չի ցանկանում հիշել կարևոր մի փաստ, ՌԴ-ն, երկար տարիներ լինելով ՀՀ ռազմավարական դաշնակիցը, միաժամանակ եղել է Ադրբեջանի զենքի գլխավոր մատակարարը, որով ՀՀ հազարավոր քաղաքացիներ են սպանվել Արցախյան առաջին, քառօրյա, 44-օրյա պատերազմների և այլ ոչ մեծամաշտաբ էսկալացիաների ժամանակ։ Այդ փաստը հաստատել էր անձամբ Ալիևը 44-օրյա պատերազմի ընթացքում՝ 2020 թվականի հոկտեմբերի 24-ին, ֆրանսիական Le Figaro-ին տված հարցազրույցում։  

«Մենք զենք են գնում շատ երկրներից։ Ամենաշատ տեխնիկան մեզ մատակարարում են ոչ թե Թուրքիան ու Իսրայելը, այլ Ռուսաստանը։ Բայց, ի տարբերություն Հայաստանի, մենք վճարում ենք Ռուսաստանից գնված զենքի համար։ Հայաստանը Ռուսաստանից զենք է ստանում անվճար։ Մենք նաև զենք ենք գնում Իրանից, Ուկրաինայից, Բելառուսից։ Իհարկե, այսօր մենք հնարավորություն ունենք ձեռք բերելու ժամանակակից զինատեսակներ, որոնք օգնում են մեր բանակին վերականգնել մեր տարածքային ամբողջականությունը»,- հայտարարել էր Ալիևը:

Մանրամասները՝ տեսանյութում։