Լաչինի միջանցքը պետք է անհապաղ բացվի. Սարգիս Խանդանյան․ ՏԵՍԱՆՅՈՒԹ

Հայաստանի դիրքորոշումը շարունակում է մնալ այն, որ Լաչինի միջանցքը համաձայն նոյեմբերի 9-ի հայտարարության և միջազգային դատարանի որոշման, պետք է անհապաղ երկկողմանի բացվի բոլոր տեսակի փոխադրումների համար: Այս մասին լրագրողների հետ զրույցում նշեց Հայաստանի Ազգային ժողովի արտաքին հարաբերությունների հանձնաժողովի նախագահ Սարգիս Խանդանյանը՝ անդրադառնալով Աղդամի ճանապարհը Լաչինի միջանցքին զուգահեռ գործարկելու մասին խոսակցություններին։

«Անկախ այն հանգամանքից, թե ինչ ճանապարհներ կգործարկվեն, երբ և ինչ ձևաչափով, մեր դիրքորոշումը և պահանջը մնում է այն, որ Լաչինի միջանցքը պետք է անհապաղ բացվի․․․

Լաչինի միջանցքը պետք է անհապաղ բացվի, իսկ մյուս ճանապարհների հետ կապված չէի ցանկանա մեկնաբանություն տալ, որովհետև դա Լեռնային Ղարաբաղի իշխանությունների և ժողովրդի որոշելիքն է։ Չեմ կարծում, որ Հայաստանն այստեղ պետք է միջամտի»,- նշեց պատգամավորը։

Սեպտեմբերի 12-ին Լեռնային Ղարաբաղում թույլ են տվել Ռուսաստանի Դաշնության հումանիտար բեռը մուտք գործի Աղդամ-Ասկերան ճանապարհով՝ պայմանով, որ կբացվի նաև Լաչինի միջանցքը։

Անդրադառնալով հարցին, թե ՞ինչ տեղեկություններ կան այդ մասով, արդյոք բանակցություններ ընթանում են Լաչինի միջանցքի բացման հարցով, Խանդանյանը պատասխանեց․ «Արցախից տեղեկություն ենք ստանում շարունակվող հումանիտար ճգնաժամի մասին, վատթարացող հումանիտար իրավիճակի մասին, այդ տեղեկությունը փոխանցում ենք մեր միջազգային գործընկերներին։ Իսկ ինչ վերաբերվում է, թե արդյոք շփումներ և բանակցություններ կան, ես ինքս չեմ տիրապետում տեղեկատվության»։

Մանրամասները՝ տեսանյութում։