15.05.2026 | 16:52
Բրունո Ֆերնանդեշը գերազանցել է Ռոնալդուի ու Դե Խեայի ռեկորդը «Մանչեսթեր Յունայթեդում»
Դատապարտում ենք ՀՀ ինքնիշխան տարածքի վրա հարձակման ցանկացած ծրագիր․ Freedom House-ի նախագահը՝ Ադրբեջանի զինուժի կուտակումների մասին
Քաղաքականություն
12.09.2023 | 15:39
Խորապես մտահոգված ենք հաղորդումներից, որ ադրբեջանական զինուժը տեխնիկա է կուտակում Հայաստանի սահմանի երկայնքով։ Այս մասին ասվում է Հայաստանի և Ադրբեջանի միջև ռազմական լարվածության աճի ու Լեռնային Ղարաբաղում իրավիճակի վատթարացման կապակցությամբ Freedom House միջազգային իրավապաշտպան կազմակերպության նախագահ Մայքլ Աբրամովիցի հայտարարությունում։
«Մենք դատապարտում ենք Հայաստանի ինքնիշխան տարածքի վրա հարձակման ցանկացած ծրագիր և կոչ ենք անում միջնորդ կողմերին՝ աշխատել Հայաստանի սահմանների հետագա ցանկացած խախտում կանխելու ուղղությամբ»,- ասվում է հայտարարության մեջ։
Նշվում է նաև, որ «Ադրբեջանի կողմից Լաչինի միջանցքի արգելափակումը տարածաշրջանի հայ բնակչության էթնիկ զտումների վտանգ է ստեղծում և սրում է Լեռնային Ղարաբաղում շարունակվող հումանիտար ճգնաժամը»։
«Մենք կոչ ենք անում Ադրբեջանի կառավարությանը՝ անկեղծորեն ներգրավվել խաղաղ բանակցություններում, ձեռնպահ մնալ Լեռնային Ղարաբաղի հայերի անվտանգությունը որպես զենք օգտագործելուց և անվերապահորեն բացել շրջափակումը՝ երաշխավորելու մարդկանց, մեքենաների և բեռների անխափան երկկողմանի տեղաշարժը Լաչինի միջանցքով: Մենք նաև կոչ ենք անում ՄԱԿ-ի Մարդու իրավունքների խորհրդին նշանակել հատուկ զեկուցող՝ գնահատելու Լեռնային Ղարաբաղում մարդու իրավունքների իրավիճակը»,- ասվում է Աբրամովիցի հայտարարությունում։
Էմմա Չոբանյան
