30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Այսօր մեկնարկում է հայ-ամերիկյան համատեղ զորավարժությունը՝ «ԱՐԾԻՎ ԳՈՐԾԸՆԿԵՐ-2023»-ը
Քաղաքականություն
11.09.2023 | 12:12
«Միջազգային խաղաղապահ առաքելություններում մասնակցության նախապատրաստման շրջանակում սեպտեմբերի 11-20-ը Հայաստանում՝ ՊՆ խաղաղապահ բրիգադի «Զառ» ուսումնական կենտրոնում և ՊՆ N ուսումնական կենտրոնում, անց է կացվելու «ԱՐԾԻՎ ԳՈՐԾԸՆԿԵՐ-2023» հայ-ամերիկյան համատեղ զորավարժությունը։
«Զորավարժությունը ենթադրում է խաղաղապահ առաջադրանքների ընթացքում հակամարտող կողմերի միջև կայունացման գործողություններ։ Զորավարժության նպատակն է բարձրացնել միջազգային խաղաղապահ առաքելությունների մասնակցող ստորաբաժանման փոխգործակցելիության մակարդակը խաղաղապահ գործողությունների շրջանակում, իրականացնել կառավարման և մարտավարական հաղորդակցման լավագույն փորձի փոխանակում, ինչպես նաև բարձրացնել հայկական ստորաբաժանման պատրաստվածությունը ՆԱՏՕ/ ԳՀԽ «Օպերատիվ կարողությունների հայեցակարգ»-ի պլանային գնահատման համար: Խաղաղապահ առաքելությունների նախապատրաստության շրջանակում միջազգային խաղաղապահ գործողությունների համար նախապատրաստվող ստորաբաժանումները պարբերաբար մասնակցում են նմանօրինակ համատեղ զորավարժությունների և վարժանքների գործընկեր երկրներում»,- ասված է ՀՀ ՊՆ-ի տարածած հաղորդագրությունում։
Հիշեցնենք, որ ռուսական կողմը մտահոգություն էր հայտնել հայ-ամերիկյան զորավարժությունների առնչությամբ։
«Զորավարժությունների մասին լուրերը, իհարկե, մտահոգություն են առաջացնում, հատկապես՝ ներկա իրավիճակում։ Ուստի մենք խորապես վերլուծելու ենք այդ լուրերը և հետևելու ենք իրավիճակին»,- ասել էր Պեսկովը։
Ապա ՌԴ նախագահի խոսնակը նշել էր, որ Հայաստանի և ԱՄՆ-ի զորավարժությունները չեն օգնի տարածաշրջանում իրավիճակի կայունացմանը։
Իսկ ՌԴ ԱԳ նախարար Սերգեյ Լավրովը հավելել էր, որ․ «Իհարկե, ոչ մի լավ բան չկա նրանում, որ ՆԱՏՕ-ի ագրեսիվ երկիրը փորձում է ներթափանցել Անդրկովկաս։ Եվ ես չեմ կարծում, որ դա ինչ-որ մեկի համար լավ է, այդ թվում ՝ հենց Հայաստանի։ Հայկական ղեկավարության գործողությունները ափսոսանք են առաջացնում»։
