Մակրոնը հեռախոսազրույց է ունեցել Փաշինյանի հետ․ քննարկել են Ադրբեջանի հետ սահմանին լարվածության աճը

Ֆրանսիայի նախագահ Էմանուել Մակրոնը ՀՀ վարչապետ Նիկոլ Փաշինյանի հետ քննարկել է Հայաստանի և Ադրբեջանի սահմանին աճող լարվածությունը և կոչ արել բոլոր տարաձայնությունները լուծել միայն դիվանագիտական ​​ճանապարհով։ Այս մասին շաբաթ օրը հայտնել է AFP-ն՝ հղում անելով Ելիսեյան պալատին, տեղեկացնում է «ՏԱՍՍ»-ը։

Նշվում է, որ խոսակցությունը տեղի է ունեցել «Հայաստանի հետ սահմանին և Ղարաբաղի մերձակայքում Ադրբեջանի կողմից ռազմական ռեսուրսների կուտակման մասին տագնապալի հաղորդագրությունների համատեքստում»։ Մակրոնը վերահաստատել է իր հավատարմությունը Լեռնային Ղարաբաղում «մարդասիրական ճգնաժամի լուծմանը» և «հակամարտության արդար և տեւական լուծմանը միջազգային իրավունքին համապատասխան և բացառապես դիվանագիտական ​​միջոցներով»։

Հինգշաբթի Հայաստանի վարչապետ Նիկոլ Փաշինյանը հայտարարեց, որ Ադրբեջանը զորքեր է կուտակել Հայաստանի հետ սահմանին և Լեռնային Ղարաբաղի հետ բաժանարար գծում։ Բաքուն հերքել է նրա հայտարարությունները։ Հինգշաբթի օրը նաև ռուս խաղաղապահները հրադադարի երկու խախտում են արձանագրել Լեռնային Ղարաբաղի Շուշիի շրջանում, զոհեր չկան, հետաքննություն է ընթանում։

Ուրբաթ օրը Բաքուն հայտարարեց, որ Հայաստանը կենդանի ուժ և ռազմական տեխնիկա է կենտրոնացնում Ադրբեջանի հետ սահմանին։ Ըստ Ադրբեջանի ԱԳՆ-ի՝ Հայաստանը «բացահայտորեն նոր խրամատներ է փորում և ամրություններ է կառուցում»։ Լեռնային Ղարաբաղի շուրջ իրավիճակի սրման մասին հայտարարությունների ֆոնին Երևանը հայտարարեց Միացյալ Նահանգների հետ համատեղ զորավարժությունների անցկացման մասին։