Հասարակություն
08.09.2023 | 20:47Ուսումնական այս տարին 2-րդ, 5-րդ և 7-րդ դասարանցիների համար տհաճ անակնկալով սկսվեց․ նոր դասագրքերից շատերը դեռ չեն հասել դպրոցներ, որոշներն էլ առհասարակ մշակման փուլում են։ Կրքերն ավելի բորբոքվեցին, երբ հրատարակչություններն ու գրախանութները սկսեցին վաճառքի հանել դասագրքեր։ Սոցիալական կայքերում այս հաստատություններին մեղադրեցին առիթից օգտվելու և դպրոցականների հաշվին բիզնես անելու մեջ։
«Էդիթ Պրինտ» հրատարակչության հիմնադիր տնօրեն Մկրտիչ Կարապետյանը պնդում է՝ իրենց կողմից դասագրքերի վաճառքն ամբողջովին օրինական է։
«Այդ գրքերի համար մենք՝ որպես ստեղծագործող, ծախսել ենք 20 միլիոն դրամ գումար, դրա փոխարեն մեզ տալու են 6 միլիոն 300 հազար դրամ գումար: Ասացին՝ սա կարող ենք ձեզ վճարել։ Հիմա իմ հրատարակչությունը 100 հոգի աշխատող ունի, ես ինչպե՞ս պետք է պահեմ այն, բա բիզնես կազմակերպություն եմ, պետք է գիրքը հանեմ վաճառքի»,- ասում է նա:
Factor TV-ի հետ զրույցում ԿԳՄՍ նախարարությունից ծնողներին հորդորեցին զերծ մնալ մասնավորից դասագրքեր ձեռք բերելուց, քանի որ պետությունը սահմանված կարգով բոլոր աշակերտներին ապահովելու է դասագրքերով: Վերջերս ԿԳՄՍ նախարար Ժաննա Անդրեասյանն ԱԺ հանձնաժողովի նիստին անդրադարձավ դասագրքերի թեմային՝ տեղեկացնելով, որ մինչև սեպտեմբերի վերջ բոլոր դասագրքերը կհասնեն դպրոցներ:
Երևանի թիվ 4 հիմնական դպրոցում, օրինակ, նոր դասագրքերի ներդրման գործընթացը, ըստ ուսուցիչների, սահուն է անցել, փոխարենը ուսուցիչները, որոնք իրենք են ընտրում՝ որ դասագրքով իրականացնել դասապրոցեսը, մեկ այլ լուրջ խնդրի են բախվել։ Մաթեմատիկա առարկայի ուսուցչուհի Քնարիկ Մաթևոսյանը փաստում է՝ իրենց քիչ ժամանակ էր տրվել դասագրքերն ուսումնասիրելու և դրանցից մեկն ընտրելու համար:
Մանրամասները՝ տեսանյութում:
Աննա Բաբաջանյան
