Ինչո՞ւ է Երևանում աղբի տեղը աղբամանի կողքին․  «Սանիթեք» ընկերության պարզաբանումը

Երևանյան փողոցներում շրջող քաղաքացիներս ու մեր երկիր այցելած զբոսաշրջիկներն «Աղբի տեղն աղբամանն է» կարգախոսը միայն տեսնում են աջ ու ձախ փակցված պաստառների վրա, որովհետև իրականում աղբի տեղը աղբամանը չէ, աղբամանի կողքին է՝ բարձված ու հսկա կույտի տեսքով։

Թե ինչու է քաղաքում նման աղբաշատ իրավիճակ ստեղծվել, և որն է Երևան քաղաքի աղբահանության թիվ մեկ պատասխանատուի՝ «Սանիթեք» ընկերության աշխատանքի թերացման պատճառը, Factor.am-ը փորձեց պարզել։

Մեզ հետ զրույցում  «Սանիթեք» ընկերության գործադիր տնօրենի օգնական Քրիստինա Հովհաննիսյանն անդրադառնալով  աղբահանության վերջին շաբաթների խայտառակ իրավիճակին՝ նշեց. «Աղբահանության աշխատանքներում նման խնդիրների պատճառը պայմանավորված է մի շարք գործոններով, որոնք բացասաբար են ազդել մեր  ընկերության աշխատանքի որակի վրա։ Խոսքը վերաբերում է և՛ Նուբարաշենի աղբավայրի ճանապարհների խնդրին, և՛ Լարսում մեքենաների կուտակմանը, քանի որ այդ ճանապարհով  ընկերությունը ներկրում էր մեքենաների սարքավորումներ, որոնք, փաստորեն, ուշ են տեղ հասնում։  Այդ պատճառով ընկերությունն ունի մեքենաների խնդիր, ինչի հետևանքով չենք հասցնում բոլոր տեղերում ապահովել աղբահանությունը պատշաճ կերպով»։

Հարցին՝ արդյոք ընկերության ունեցած տեխնիկական խնդիրները պետք է հետաքրքրե՞ն քաղաքացիներին, որոնք ստիպված են ամառվա տապին շնչել աղբի գարշահոտությունը, Քրիստինա Հովհաննիսյանը պատասխանեց․ «Քանի որ մենք այն ընկերությունը չենք, որն իր խնդիրները բարդում է տարբեր հանգամանքների վրա,  ուստի «Սանիթեք» ընկերության տնօրինությունը մշակել է ճգնաժամային ծրագիր, մենք պատրաստվում ենք շահագործման հանձել ևս մի քանի նոր մեքենա և խոստանում ենք շատ արագ՝ մեկ շաբաթվա ընթացքում, կարգավորել հարցը»։

Այստեղ հարկ ենք համարում նշել, որ Երևան քաղաքի աղբահանությունն առաջին անգամ չէ, որ այս վիճակում է, նախորդ տարի ևս պատկերը նույնն էր և ընկերության աշխատակիցները գործի անցան միայն այն ժամանակ, երբ աղբի թեման հասավ ֆեյսբուք։

Աղավնի Սուքիասյան