20.02.2026 | 23:28
ԱՄՆ-ն էլ է պահանջում, որ Ուկրաինան հանձնի ամբողջ Դոնբասը․ Զելենսկի
«Ականատես»-ը պնդում է՝ դիտորդը հարձակման է ենթարկվել ՔՊ շտաբի աշխատակիցների կողմից, կուսակցությունը պարզաբանում է
Հասարակություն
07.09.2023 | 14:41
«Ականատես» դիտորդական առաքելությունը երեկ ահազանգեց, որ իրենց կազմակերպության դիտորդը հարձակման է ենթարկվել «Քաղաքացիական պայմանագիր» կուսակցության համակիր, Երևանի թիվ 11 մանկապարտեզի տնօրենի ժամանակավոր պաշտոնակատարի կողմից։
«Հերթական շրջայցի ընթացքում դիտորդն այցելել է Կենտրոն վարչական շրջանի Ռուսթավելի 17 հասցե՝ ընտրողների ցուցակների ճշգրտության ստուգման նպատակով։ Նույն փողոցի վրա է գտնվել «Քաղաքացիական պայմանագիր» կուսակցության նախընտրական շտաբը։ Դիտորդը լուսանկարել է նաև շտաբը, դրա շրջակայքում առկա քարոզչական նյութերը։ Աշխատանքի ընթացքում դիտորդին է մոտեցել թիվ 11 մանկապարտեզի տնօրենի ԺՊ Սոֆիկ Կարապետյանը, ասելով, որ դիտորդն իրավունք չունի լուսանկարել «իրենց շտաբը» կամ հարցեր տալ հասցեների հետ կապված։ Կինը վեճի է բռնվել դիտորդի հետ, խոչընդոտել լուսանկարահանմանը, խլել դիտորդի՝ ԿԸՀ կողմից տրամադրված վկայականը»,- ֆեյսբուքյան էջում կատարված գրառմամբ հայտնել է դիտորդական առաքելությունը։
«Ականատես»-ի պնդմամբ՝ Սոֆիկ Կարապետյանին միացել են ևս երկու անձինք՝ ենթադրաբար՝ շտաբի աշխատակիցներ, փորձել վեճի բռնվել և վիրավորել դիտորդին:
Factor.am-ը միջադեպի առնչությամբ պարզաբանումներ ստանալու համար դիմեց «Քաղաքացիական պայմանագիր» կուսակցության նախընտրական շտաբի մամուլի քարտուղար Հայկ Կոստանյանին։
«Դիտորդը մոտեցել և հասցե է ճշտել, ինչից հետո մոտեցել է հարակից սեփական տներից մեկին հայտարարել է, թե իրենց տեղեկություններով այդտեղ 50 անձ է գրանցված, ինչին ի պատասխան մանկապարտեզի տնօրենը հակադարձել է, ասելով՝ այդ տանը գրանցված են միայն ինքը և աղջիկը։ Ապա հարցրել է՝ Դուք ո՞վ եք, որ նման հարցեր եք տալիս, դիտորդը բեյջն է ցույց տվել, նա էլ վերցրել է, որ նայի»,- FactorTV-ի հետ զրույցում ասաց Հայկ Կոստանյանը։
Հարցին՝ վիրավորանք եղե՞լ է, Կոստանյանը բացասական պատասխան տվեց.
«Նրանց են միացել ՔՊ շտաբի աշխատակիցներ, որոնք միասին այլ հարցեր են քննարկել։ Իսկ, որ ասում են՝ վեճ, խոչընդոտել են և այլն, հա, գուցե կանայք միասին մի քիչ բարձր տոների մեջ են եղել»։
Դիտորդական առաքելությունը տարածած հաղորդագրության մեջ նշում է, որ հաղորդում կներկայացնի իրավապահ մարմիններին՝ դիտորդական առաքելության իրավունքների խոչընդոտման դեպքով։ Այս մասով տեղեկություններ դեռևս չկան։
Ռոզա Վարդանյան
