Ինչո՞ւ Ավինյանն այսօր չէր վարում գործակարգավարական նիստը

Չնայած անցած երկուշաբթի Երևանի քաղաքապետարանից Factor.am-ին հայտնել էին, որ գործակարգավարական նիստերը քարոզարշավի փուլում վարելու է քաղաքապետի տեղակալ Տիգրան Ավինյանը, այդուհանդերձ՝ նիստն այսօր վարեց քաղաքապետի ժամանակավոր պաշտոնակատար Լևոն Հովհաննիսյանը։

Քաղաքապետի մամուլի խոսնակ Հայկ Կոստանյանից փորձեցինք՝ ճշտել, թե ինչու Տիգրան Ավինյանը չվարեց նիստը։ Կոստանյանի՝ փոխանցմամբ՝ պատճառն այն է, որ Ավինյանը ներկա է գտնվել Ղևոնդ Ալիշանի անվան համար 95 և Սամվել Հովսեփյանի անվան համար 116 դպրոցների բացմանը և արձակուրդում չի լինելու՝ ինչպես նախապես ասել էին։

Անցած երկուշաբթի Factor.am-ը գրել էր, որ քարոզարշավի փուլում գործակարգավարական նիստերը վարելու է Տիգրան Ավինյանը՝ միայն այդ օրերին ընդհատելով արձակուրդը։ Եվ եթե Ավինյանն իր արձակուրդն օգտագործեր ըստ քաղաքապետի խոսնակի տրամադրած՝ ժամանակացույցի, կստացվեր, որ քաղաքապետարանը խախտում է օրենքը՝ հնարավորություն տալով Ավինյանին գործակարգավարական նիստերը վարելու համար վերադառնալ արձակուրդից։ Աշխատանքային օրենսգիրքը սահմանում է, որ ամենամյա արձակուրդը մասերով տրամադրելու դեպքում դրանցից մեկը պետք է կազմի առնվազն 10 աշխատանքային օր` հնգօրյա աշխատանքային շաբաթվա դեպքում, և առնվազն 12 աշխատանքային օր` վեցօրյա աշխատանքային շաբաթվա դեպքում: Մինչդեռ, եթե Տիգրան Ավինյանը իրեն հասանելիք տարեկան արձակուրդը սպառեր այն ժամանակացույցով, որ մեզ տրամադրել էր քաղաքապետարանը, դրանցից ոչ մեկը չէր կազմի առնվազն 10 աշխատանքային օր և այդպիսիով՝ քաղաքապետարանը կխախտեր օրենքը։ Իսկ այսօր չընդհատելով արձակուրդը, ըստ էության, չի խախտվի աշխատանքային օրենսգրքի պահանջը, որ ամենամյա արձակուրդը մասերով տրամադրելու դեպքում դրանցից մեկը պետք է կազմի առնվազն 10 աշխատանքային օր։

Շողիկ Գալստյան