Սահմանին լարվածությունը պահպանվում է․ Անդրանիկ Քոչարյան. ՏԵՍԱՆՅՈՒԹ

«Այդ որոշումը կայացվել է Արցախում և ոչ թե ՀՀ իշխանությունների հետ քննարկման արդյունքում․ դա ակնհայտ է»,- այս մասին Factor TV- ի հետ զրույցում նշեց ՀՀ ԱԺ Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը՝ անդրադառնալով Արցախի նախագահ Արայիկ Հարությունյանի հրաժարականի մասին հայտարարությանը։

«Արցախի նախագահի հրաժարականի մասին առաջին արտահոսքը հնչեցրեց Ռուբեն Վարդանյանը, որն Արցախում ինչ-որ ծրագրեր է իրականացնում․ պարզվեց ծրագրերից ամենակարևորն Արցախի նախագահի հրաժարականին հասնելն է։

Հնարավոր է, որ Արցախի ԱԺ-ն չհարգի այդ ցանկությունը, և երբ Արայիկ Հարությունյանը կպնդի, այն ժամանակ այս գործընթացը կդառնա անշրջելի։
Արայիկ Հարությունյանի հրաժարականին ձգտում էին 7+1 հոգի, այդ մեկը Ռուբեն Վարդանյանն է, մյուս 7-ը կբացահայտվեն ընթացքում, կարծում եմ՝ նրանց մեջ Արցախի նախկին իշխանությունների կարկառուն ներկայացուցիչներ կլինեն։

Ես կցանկանայի Արցախի նախագահի հրաժարականի դրդապատճառների մասին լսել հենց Արայիկ Հարությունյանից, որովհետև դա կապվում է սահմանային ճգնաժամի հետ՝ Աղդամի և Լաչինի միջանցքի հնարավոր լուծումներ գտնելու, հումանիտար ճգնաժամը հաղթահարելու տեսանկյունից»,- նշեց Քոչարյանը։

ՀՀ ԱԺ Պաշտպանության և անվտանգության հարցերի մշտական հանձնաժողովի նախագահի խոսքով՝ պաշտոնական հաղորդագրության համաձայն՝ սահմանին լարվածությունը պահպանվում է։

Անդրադառնալով ՊՆ հայտարարությանը սահմանային լարվածության և Սոթքի հատվածում տեղակայված հայկական դիրքերի ուղղությամբ Ադրբեջանի ԶՈՒ կրակի հետևանքով հայկական կողմի զոհերի մասին, Քոչարյանը նշեց․ «Ես տեղեկություն ումեմ, որ հակառակորդը կիրառել է ականանետ, ինչի հետևանքով կարող էին զոհեր լինել․․․ Ենթադրում եմ, որ լարվածությունն ինչ-որ պահի հնարավոր կլինի կասեցնել։ Մեզ խիստ անհրաժեշտ է ունենալ ոչ կրակային միջավայր և պահպանել թեկուզ այս փխրուն խաղաղությունը»։

Մանրամասները՝ տեսանյութում։