12.03.2026 | 23:35
Վթար Երասխ-Երևան ավտոճանապարհին․ կան տուժածներ
«Անպատվություն է Ազնավուրի հիշատակի հանդեպ»․ արձանի 37 էսքիզներից հնարավոր է՝ հաղթող չլինի․ ՏԵՍԱՆՅՈՒԹ
Մշակույթ
30.08.2023 | 22:00
Երևանի Ֆրանսիայի հրապարակում տեղադրվելիք Շառլ Ազնավուրի հուշարձանի շուրջ կրքերի նոր ալիք է բորբոքվել։ Արդեն մի քանի օր է՝ օնլայն տիրույթում բուռն կերպով քննարկվում են հուշարձանի նախագծի ընտրության բաց մրցույթին ստացված 37 հայտ-էսքիզները, որոնք հասցրել են արժանանալ հանրային պարսավանքի։ Դրանք ներկայացվել են հատուկ ձևավորված 12 հոգանոց կազմով հանձնաժողովի քննարկմանը։ Հանձնաժողովում ընդգրկված են Երևանի քաղաքապետարանի պատասխանատուներ, Ազնավուրի ընտանիքի անդամներ, ոլորտի մասնագետներ:
Այս տարվա մայիսին Երևանի փոխքաղաքապետ Տիգրան Ավինյանը հրապարակել էր քանդակագործ Դավիթ Երևանցու առաջարկած մանրակերտն ու հայտարարել, որ 2024-ին Ազնավուրի ծննդյան 100-ամյակին նվիրված միջոցառումների շրջանակում Ֆրանսիայի հրապարակում կտեղադրվի շանսոնյեի արձանը։ Հանրության ճնշումների ներքո, սակայն, քաղաքապետարանը հայտարարեց մրցույթ, որն ամփոփվեց օգոստոսի 25-ին։ Արվեստի քննադատ և համադրող Լիլիթ Սարգսյանը կոչ է անում Երևանը հանգիստ թողնել ու ոչ մի նոր արձան չկառուցել, քանի որ, նրա համոզմամբ, անկախության շրջանից ի վեր մոնումենտալ արձանագործությունը մեզ մոտ հաջող չի ստացվում։
Երևանի Քաղաքապետարանի աշխատակազմի մշակույթի և տուրիզմի վարչության պետի տեղակալի ժամանակավոր պաշտոնակատար Գևորգ Սահակյանը, սակայն, շեշտում է՝ մրցույթի մասնակիցները բավականաչափ ժամանակ են ունեցել էսքիզները ներկայացնելու համար, արդյունքում ստացվել է այն, ինչ ստացվել է, իրենք ֆիլտրել չեն կարող։
Ի դեպ, «Ակտիվ քաղաքացի» հարթակում մինչև օգոստոսի 31-ը` ժամը 14:00-ն, քաղաքացիները կարող են քվեարկել ներկայացված նախընտրելի նախագծի օգտին:
Լիլիթ Սարգսյանը նշում է՝ մահարձան հիշեցնող ֆորմատը վաղուց արդեն արդիական չէ, իսկ եթե արվեստագետները չեն կարողանում արդիական լուծումներ գտնել, ավելի լավ է՝ որևէ նոր բան չնախաձեռնեն։
Գեղանկարիչ Հաղթանակ Շահումյանը ևս ներկայացված էսքիզների մեջ հաջող տարբերակ չի նկատել։ Նա նշում է, որ արդեն մեկ անգամ սխալվել և տրանսպորտային այդ խիտ հանգույցում արձան տեղադրել են (խոսքը Ռոդենի արձանի մասին է), ասում է՝ պետք չէ նույն սխալը գործել երկրորդ անգամ։
Մանրամասները՝ տեսանյութում։
Աննա Բաբաջանյան
