Քաղաքականություն
23.08.2023 | 11:30Այսօր մեկնարկել է սեպտեմբերի 17-ին կայանալիք Երևանի ավագանու ընտրությունների քարոզարշավը. առաջիկա շաբաթներին 14 քաղաքական ուժ փորձելու է համոզել երևանցիներին իր օգտին քվեարկել։
«Իմ մարտավարությունը անկեղծությունն է լինելու: Ես երևանցիների հետ խոսելու եմ ուղիղ, բաց, ինչպես արել եմ միշտ: Այս անգամ պետք է անեմ այնպես, որ նաև լսեն ու հավատան, քիչ է իմ անկեղծ լինելը, ես պետք է կարողանամ այնպես անել, որ այդ անկեղծությունը տեղ հասնի»,- այս մասին «Ապրելու երկիր» կուսակցության քարոզարշավի պաշտոնական մեկնարկի միջոցառումից հետո լրագրողների հետ զրույցում նշեց «Ապրելու երկիր» կուսակցության նախագահ, Երևանի քաղաքապետի թեկնածու Մանե Թանդիլյանը։
Անդրադառնալով հարցին՝ կճանաչե՞ք Ադրբեջանի տարածքային ամբողջականությունը՝ Թանդիլյանը պատասխանեց․ «Մենք իրավունք չունենք, մեր ժեղովուրդը, մեր սահմանադիրը դա չի ճանաչել, մեր ժողովուրդը դեմ է դրան, մենք ո՞վ ենք , որ դեմ կանգնենք ժողովրդի կամքին»։
Ներկայացնելով, թե ինչ դիրքորոշում ունի իրենց կուսակցությունը Արցախը Ադրբեջանի կազմում ճանաչելու հարցում, Թանդիլյանը նշեց․ «Մենք պարտավոր ենք իշխանափոխություն անել, որպեսզի կարողանանք Արցախը Ադրբեջանի կազմ ճանաչելու ընթացքը կասեցնենք: Մեզ համար այս պայքարը նրա մասին է, որ մենք ամրեցնենք մեր պետականությունը, և միայն ուժեղ պետությունն է, ուժեղ Հայաստանն է, որ ի վիճակի է պաշտպանել Արցախը»։
«Այս իշխաությունից ակնկալում ենք չփակել Արցախի ինքնորոշման իրավունքի բոլոր դռները․ դա միջազգայնորեն ընդունված իրավունք է»- ընդգծեց «Ապրելու երկիր» կուսակցության նախագահը։
Թանդիլյանն անդրադաձավ նաև հնարավոր թիրախավորման վերաբերյալ դիտարկմանը՝ նշելով․ «Ես ոչ միայն սպասում եմ գրոհի, այլև պատրաստ եմ դրան: Սա նշանակում է լինել ուժեղ ոտքերի վրա կանգնած, սա նշանակում է իմանալ, թե ինչ են պատրաստվում անել, և ունենալ հակամիջոցներ: Նորմալ բան է, որ թիրախավորում են, ես չեմ հասկանում, որ թիրախավորման միջոցով փորձում են ստեղծել պատկեր, որը իրական չէ»։
Անդրադառնալով հարցին, թե արդյո՞ք իրենք պատրաստ են հետընտրական փուլում համագործակցել այլ ուժերի հետ, Թանդիլյանը պատասխանեց. «Մեզ համար կարմիր գիծ է ՔՊ-ի հետ որևէ համագործակցություն, և նախկին բարքերին վերադարձ չի լինելու։ Եվ բոլոր նրանց հետ, ովքեր նվիրված են լինելու Երևանի ու Հայաստանի զարգացմանը, ովքեր կիսելու են մեր տեսլականը, մենք պատրաստ ենք համագործակցելու»:
Մանրամասները՝ տեսանյութում։
