Ամո՛թ է, որ հայերի նկատմամբ ցեղասպանություն է տեղի ունենում, իսկ մենք դա չենք կանգնեցնում․ Օկամպո

Արցախում արդեն իսկ ցեղասպանություն է իրականացվում, բայց մենք դեռ կարող ենք կանխել մարդկանց ֆիզիկական մահը։ Անհրաժեշտ է կանխել այսօր Ադրբեջանում ապրող 120 հազար հայերի մահն ու ֆիզիկական ոչնչացումը։ Այս մասին Democracy now-ին ասել է արգենտինացի իրավաբան, Միջազգային քրեական դատարանի նախկին դատախազ Լուիս Մորենո Օկամպոն, որն օգոստոսի սկզբին զեկույց էր հրապարակել Արցախի շրջափակման մասին։

«Հայաստանին հաջողվեց գործը հասցնել ՄԱԿ-ի Անվտանգության խորհուրդ, որտեղ կարևոր է ԱՄՆ-ի, Ռուսաստանի և Ֆրանսիայի միջև շատ բարդ համաձայնության կնքումը։ Այդ երեք երկրները հակամարտության մեջ են Ուկրաինայում, սակայն Հայոց ցեղասպանության զոհերը չեն կարող լինել ուկրաինական հակամարտության կողմնակի վնասը։ Եթե ​​Ռուսաստանը, ԱՄՆ-ը և Ֆրանսիան համաձայնեն, մեկ օրում Հայոց ցեղասպանությանը վերջ կդրվի։ Բայց սա լուծելու համար ոչ թե պատիժ կամ հետաքննություն է անհրաժեշտ, այլ քաղաքական համաձայնագիր ԱՄՆ-ի, Ֆրանսիայի և Ռուսաստանի միջև»,- ասել է Օկամպոն։

Նա նաև նշել է, որ այն, ինչ այսօր կատարվում է Արցախում, դասագրքային օրինակ է ցեղասպանության մասին:

«Ցեղասպանության մասին կոնվենցիայի II.c հոդվածը սահմանում է «ցեղասպանությունը» որպես ոչ միայն մարդկանց սպանությունը, այլև նրանց ֆիզիկական ոչնչացման համար պայմաններ ստեղծելը։ Եվ դա այն է, ինչ այսօր կատարվում է Արցախում։ Ես այսօր Բոգոտայում եմ՝ Կոլումբիայում, որտեղ հսկայական ջանքեր են գործադրում օրենքը, բանակը և քաղաքականությունն ինտեգրելու համար՝ զանգվածային բռնությունը վերահսկելու նպատակով: Դա այսօր անհրաժեշտ է անել Հայաստանում՝ հայերին փրկելու համար։ Ամո՛թ է, որ 2023 թվականին հայերի նկատմամբ ցեղասպանություն է տեղի ունենում, իսկ մենք դա չենք կանգնեցնում։ Դա տեղի է ունենում այսօր»,- ընդգծել է Օկամպոն։