Արցախցի լրագրող Մարութ Վանյանը X-ում (նախկին Twitter) ահազանգել է խորացող հումանիտար ճգնաժամի մասին։ «Ստեփանակերտ․ Այսօր հնարավոր չէ հաց գնել նույնիսկ գիշերը։ Թխելու այլուր չկա – ասում է իմ փողոցի հացատան աշխատակիցը»,- գրառում է Վանյանը և լուսանկար հրապարակել։
Հունիսի 15-ից Ադրբեջանն ամբողջությամբ արգելափակել է հումանիտար բեռնափոխադրումները Հայաստանից Արցախ։ Ստեփանակերտի բնակիչ Մելինե Նավասարդյանը Factor.am-ի հետ զրույցում ասաց, որ արդեն քանի օր է՝ հացի լրջագույն խնդիր կա։ Ասում է՝ երբեմն մինչև հերթը հասնում է, կամ արդեն հաց չի լինում, կամ հոսանքի անջատումների պատճառով վառարանները չեն աշխատում։
«Գիշերվա կեսից՝ ժամը 05։00-ից գնում եմ հերթագրվելու, որ առավոտ շուտ կարողանանք հաց առնել։ էն էլ երկու հացով երեք երեխան, տատիկը և ես ո՞նց յոլա գնանք։ Ահավոր է, արդեն տան ամեն ինչն էլ վերջացել է, չգիտեմ ինչ անեմ, երեխեքս ինձ են նայում, գիտեն որ խանութներում բան չկա, ստիպված լռում են։ Հեռուստացույց չեմ միացնում, որ մի բան ցույց չտան երեխաներիս աչքը մնա վրեն», – ասում է Ստեփանակերտի բնակիչը։
Մելինե Նավասարդյանը վարձով է բնակվում, սակայն շրջափակման պատճառով այժմ աշխատանք էլ չունի, ո՛չ տան վարձն է կարողանում վճարել, ո՛չ կոմունալները։
«Շատ ժամանակ հացի գունդ են տալիս, բերում եմ, հաց թխում երեխեքիս համար, որ գոնե դա ուտեն, ուտելու ոչ մի բան չկա, դիմանալու չի էս վիճակը»։
Մելինե Նավասարդյանն ասում է՝ չնայած դժվարություններին՝ սպասում են այն հույսով, որ մի օր լույս կբացվի։
