«Շատ կարևոր է, որպեսզի միջազգային դերակատարները նաև գործուն քայլեր ձեռնարկեն՝ խնդիրը կարգավորելու ուղղությամբ: Մենք չենք կարող ժամանակակից աշխարհում խոսել առնվազն երաշխավորված իրավունքների մասին: Մենք պետք է ունենանք հիմնարար իրավունքների լիակատար պաշտպանություն և երաշխավորում»,- այսօր կառավարության նիստից հետո լրագրողների հետ ճեպազրույցում անդրադառնալով Արցախում հումանիտար ճգնաժամի հետ կապված միջազգային կառույցների արձագանքներին, այս մասին նշեց ՀՀ Մարդու իրավունքների պաշտպան Անահիտ Մանասյանը։
ՄԻՊ-ը նաև հայտնեց, որ Ադրբեջանի մարդու իրավունքների պաշտպանին մեկ ամիս առաջ նամակ է գրել, բայց դեռևս պատասխան չի ստացել։
Անդրադառնալով Հակարիի կամրջի մոտից Ադրբեջանի կողմից Արցախի բնակիչ Վագիֆ Խաչատրյանի առևանգմանը, Մանասյանը նշեց, որ ՄԻՊ-ի ուսումնասիրության կենտրոնում Վագիֆ Խաչատրյանի հիմնարար իրավունքների պաշտպանությունն է․ «Նրա հիմնարար իրավունքների միջամտությունը տեղի է ունենում միջազգային իրավական երաշխիքների և չափանիշների խախտմամբ։ Դա հիմնավորվում է փաստական տվյալներով։ Միջազգային մարդասիրական իրավունքի տեսանկյունից անձը, փաստացի, ազատությունից զրկվել է մարդասիրական առաքելության իրականացման համատեքստում, երբ նա մարդասիրական պաշտպանության ներքո գտնվող անձ էր:
Նրա նկատմամբ միջազգային հետախուզում հայտարարված չէ, և անձը զինվորական ծառայության է անցել շատ ավելի ուշ, քան նրան մեղսագրվող արարքն է կատարվել»:
Մանրամասները՝ տեսանյութում։
