12.03.2026 | 22:38
Թուրքիայում սկսել են ձերբակալել ու ճնշել Ալիևին քննադատողներին՝ Ադրբեջանից Էրդողանի փեսայի հասցեին մեղադրանքներից հետո
ՔՈ գործադիր մարմնի անդամները բերման են ենթարկվել Մաշտոցի պուրակում վրան տեղադրելու փորձի ժամանակ
Հասարակություն
17.08.2023 | 10:35
ՀՀ փոխոստիկանապետը, մոտ 40 համազգեստով և մոտ 10 քաղաքացիական հագուստով ոստիկաններ կեսգիշերին Մաշտոցի պուրակից բերման են ենթարկել Վահագն Մինասյանին, «Քաղաքացու որոշում» ՍԴԿ գործադիր մարմնի անդամներ Սուրեն Սահակյանին, Հայկ Սահակյանին: Նրանք փորձել են վրան տեղադրել, որպեսզի առաջիկա շաբաթը անցկացնեն շուրջօրյա հանդիպում-քննարկումներով, որոնց նպատակն է ձևավորել նախաձեռնող շտաբ` Հայաստանին սպառնացող վտանգները չեզոքացնելու նպատակով։ Այս մասին Ֆեյսբուքի իր էջում գրել է «Քաղաքացու որոշում» ՍԴԿ գործադիր մարմնի անդամ Միքայել Նահապետյանը:
«Բնականաբար ոստիկանության ապօրինի այս գործողությունը ոչինչ չի փոխի և տղերքը պնդում են, որ հնազանդվելը մահ է, պայքարը` կյանք»,- գրել է Նահապետյանը:
Factor.am-ի հետ զրույցում Վահագն Մինասյանն ասաց, որ իրենք երեքն էլ ազատ են արձակվել, իրենց նկատմամբ վարչական իրավախախտում կատարելու արձանագրություն է կազմվել Վարչական իրավախախտումների վերաբերյալ օրենսգրքի 182-րդ հոդվածով, այն է՝ ոստիկանի օրինական պահանջը չկատարելը: Ըստ ոստիկանության՝ բաժին տարված անձանց իրավախախտումը այն է, որ չեն ենթարկվել ոստիկանների՝ վրան չտեղադրելու վերաբերյալ պահանջին:
Հարցին՝ դարձյալ փորձելո՞ւ են վրան տեղադրել, Մինասյանն ասաց, որ իրենց շարժվելու են իրենց օրակարգով:
Տեսանյութը՝ այստեղ։
Արաքս Մամուլյան
