Քաղաքականություն
16.08.2023 | 12:16
Հայաստանի պահանջով ՄԱԿ-ի Անվտանգության խորհրդի արտակարգ նիստը տեղի կունենա այսօր Երևանի ժամանակով ժամը 23։00-ին (Նյու Յորքի ժամանակով ժամը 15։00-ին)։ Նիստի հեռարձակմանը կարող եք հետևել Factor TV-ի ուղիղ եթերում։ Նիստին մասնակցելու համար Նյու Յորք է մեկնել ՀՀ ԱԳ նախարար Արարատ Միրզոյանը։
Հիշեցնենք, որ օգոստոսի 11-ին Հայաստանի Հանրապետությունը դիմել էր Միավորված ազգերի կազմակերպոության Անվտանգության խորհուրդ՝ Լեռնային Ղարաբաղի խաղաղ բնակչությանը հարկադրված լիակատար շրջափակման հետևանքով հումանիտար իրավիճակի վատթարացման առնչությամբ արտահերթ նիստ գումարելու պահանջով:
Նիստն անցկացնելու համար ՄԱԿ-ում Հայաստանի դեսպան Մհեր Մարգարյանը դիմել է Ամերիկայի դեսպանին, որն այս ամիս նախագահում է Անվտանգության խորհրդում։ ԱՄՆ կոնգրեսական Ադամ Շիֆն էլ Լաչինի միջանցքի ապաշրջափակման հարցում ԱՄՆ միջամտության անհրաժեշտության վերաբերյալ նամակ է ուղղել Միացյալ Նահանգների նախագահ Ջո Բայդենին։
«Արցախում ստեղծված ճգնաժամը ԱՄՆ-ից անհապաղ գործողություններ է պահանջում։ Այսօր ես կոչ եմ արել նախագահ Ջո Բայդենին Անվտանգության խորհրդի հրատապ նիստ հրավիրել՝ ադրբեջանական շրջափակումը դադարեցնելու համար: Եվ օգտագործե՛ք հասանելի ամեն գործիք՝ աջակցելու արցախցիներին և կանխելու հերթական ցեղասպանությունը»,- գրել է կոնգրեսականը։
2023 թվականի հունիսի 15-ից առաջին անհրաժեշտության ապրանքների, այդ թվում՝ սննդամթերքի, դեղորայքի և վառելիքի ծայրահեղ պակասը սրվել է, երբ Ադրբեջանը լիովին փակեց Լաչինի միջանցքը՝ Լեռնային Ղարաբաղը Հայաստանի և արտաքին աշխարհի հետ կապող միակ ճանապարհը՝ արգելելով որևէ, նույնիսկ մարդասիրական մուտքը Լեռնային Ղարաբաղ: Արցախի ՄԻՊ-ն էլ երեկ հայտնեց, որ քրոնիկ թերսնուցման, սպիտակուցաէներգետիկ անբավարարության հետևանքով Ստեփանակերտի բնակիչ է մահացել։ Իսկ Մարտակերտի շրջանում այսօր չծնված երեխայի մահվան դեպք է գրանցվել՝ վառելիքի բացակայությամբ պայմանավորված շտապ օգնության անհասանելիության պատճառով։
