06.06.2026 | 16:10
Դատախազությունը զգուշացնում է՝ վարժական հավաքից խուսափելը հանցագործություն է. այն պատժվում է 1-3 տարի ժամկետով ազատազրկմամբ
Վաշինգտոնը հերթական անգամ կոչ է արել Ադրբեջանին վերականգնել Լաչինի միջանցքով ազատ տեղաշարժը
Քաղաքականություն
16.08.2023 | 11:11
ԱՄՆ հերթական անգամ կոչ է արել Ադրբեջանին վերականգնել Լաչինի միջանցքով ազատ տեղաշարժը։ Այս մասին խոսել է Պետդեպարտամենտի փոխխոսնակ Վեդանտ Պատելը։
«Մենք շարունակում ենք խորապես անհանգստացած մնալ Լաչինի միջանցքի շարունակական փակմամբ, մասնավորապես՝ առևտրային, մարդասիրական և մասնավոր մեքենաների համար։ Այս տեսակի մարդասիրական երթևեկության դադարեցումը, մեր կարծիքով, վատթարացնում է հումանիտար իրավիճակը և խաթարում է խաղաղ գործընթացի նկատմամբ վստահություն ստեղծելու ջանքերը։ Եվ այսպես, մենք կոչ ենք անում Ադրբեջանի կառավարությանը վերականգնել այս միջանցքով առևտրային, հումանիտար և մասնավոր մեքենաների ազատ տարանցումը։ Մենք նաև տեղյակ ենք, որ չորեքշաբթի օրը ՄԱԿ-ի Անվտանգության խորհուրդը հանդիպում կունենա՝ քննարկելու Լեռնային Ղարաբաղի հարցը, և մենք ակնկալում ենք, որ այնտեղ նույնպես տեղի կունենան հետագա քննարկումներ»,-ասել է Պատելը։
Վերջինս նաև նշել է, որ ուղիղ երկխոսությունը էական նշանակություն ունի հակամարտության կարգավորման համար։
«Մենք հետևողականորեն ընդգծել և կրկնել ենք այն փաստը, որ ուղիղ երկխոսությունը էական նշանակություն ունի այս երկարամյա հակամարտությունը լուծելու համար, և կարծում ենք, որ ցանկացած ներգրավվածություն, որն, ի վերջո, խաղաղություն և կայունություն կբերի Հարավային Կովկասի ժողովրդին, լավ և դրական քայլ կլինի»,-ասել է ամերիկացի պաշտոնյան։
