12.03.2026 | 23:35
Վթար Երասխ-Երևան ավտոճանապարհին․ կան տուժածներ
Ինչո՞ւ է արդեն Ադրբեջանի կողմից 120,000 հայերի նկատմամբ ցեղասպանություն իրականացվել․ Օկամպոն հիմնավորումներ է ներկայացրել
Քաղաքականություն
14.08.2023 | 14:33
Միջազգային քրեական դատարանի հիմնադիր դատախազ, Global Practice Hub-ի հիմնադիր, արգենտինացի փաստաբան Լուիս Մորենո Օկամպոն X-ում պարզաբանել է, թե ինչու է արդեն Ադրբեջանի կողմից 120,000 հայերի նկատմամբ ցեղասպանություն իրականացվել։
«Ինչո՞ւ է արդեն Ադրբեջանի կողմից 120,000 հայերի նկատմամբ ցեղասպանություն իրականացվել։ Հանցագործությունը մանրակրկիտ սահմանվում է Ցեղասպանության մասին կոնվենցիայի II հոդվածում, ներառյալ հինգ ենթաակտերում:
«Խմբի կենսագործունեության պայմանների միտումնավոր ազդեցությունը, որը հաշվարկված է նրա ֆիզիկական ոչնչացման համար» բնորոշումը II հոդվածի (c) կետի ներքո է։
Լեռնային Ղարաբաղում ապրող հայերին սննդով, դեղորայքով և կենսական անհրաժեշտության այլ պարագաներով ապահովելու միակ միջանցքի լիակատար շրջափակումն արդեն իսկ ստեղծել է նման պայմաններ»,- գրել է Օկամպոն։
Փաստաբանը պարզաբանում է, որ օրենքը չի պահանջում բուն «ոչնչացում», բավական է «ֆիզիկական ոչնչացման» համար պայմաններ «ստեղծելը», այսպիսով, 2-րդ հոդվածով սահմանված ցեղասպանությունն արդեն իրականացված է։
«Դեռևս հնարավոր է կանխել ցեղասպանության այլ ձևերը, ինչպիսիք են՝ (ա) խմբի անդամների սպանությունը, և (բ) խմբի անդամներին լուրջ մարմնական կամ հոգեկան վնաս պատճառելը:
Ցեղասպանության մասին կոնվենցիայի մասնակից 153 պետությունները պարտավորվել են կանխել և պատժել ցեղասպանությունը։ Այժմ առաջնահերթ խնդիրն է՝ վերջ տալ ցեղասպանությանը, որն արդեն իրականացվել է II հոդվածի (գ) կետի համաձայն՝ վերացնելով Լաչինի միջանցքի շրջափակումը և կանխելով սպանությունների միջոցով նոր ցեղասպանությունը»,- գրել է Օկամպոն՝ հիշեցնելով, որ ՄԱԿ-ի Անվտանգության խորհուրդը, որը պատասխանատու է միջազգային խաղաղության և անվտանգության համար, առաջիկա օրերին կքննարկի խնդիրը։
ԱՄՆ-ը, Ֆրանսիան և Ռուսաստանը 153 պետությունների թվում են, որոնք վավերացրել են «Ցեղասպանության կոնվենցիան» պայմանագիրը։
