«Անկեղծ ասած` ուրախ չեմ պաշտպանել այն մարդուն, որը զրպարտել է ինձ»․ Սերժ Սարգսյանը` Սերգո Կարապետյանի մասին. ՏԵՍԱՆՅՈՒԹ

«Ես առանձնապես ասելիք չունեմ, դատաքննության ողջ ընթացքն, իմ կարծիքով, հստակ ապացուցեց, որ Սերգո Կարապետյանը ճիշտ որոշում է կայացրել: Եթե նա այդպիսի որոշում չկայացներ, ապա պատասխանատվություն կկրեր այն ժամանակ, ոչ թե հիմա» ,- այս մասին այսօր դատարանում հայտարարեց Հայաստանի երրորդ նախագահ Սերժ Սարգսյանը:

Հիշեցնենք, որ դատարանում քննվող գործը վերաբերում է շուրջ 10 տարի առաջ վառելիքի մատակարարման գործընթացում ենթադրյալ չարաշահումներին: Գործով ի սկզբանե ամբաստանվում էր 5 անձ: Նրանցից 4-ին՝ Սերժ Սարգսյանին, «Ֆլեշ» ընկերության նախկին սեփականատեր Բարսեղ Բեգլարյանին, գյուղատնտեսության նախկին փոխնախարար Սամվել Գալստյանին և նույն նախարարության Բուսաբուծության վարչության պետ Գևորգ Հարությունյանին մեղադրանք էր առաջադրվել Քրեական օրենսգրքի 38-179-րդ հոդվածի 3-րդ մասի 1-ին կետով (առանձնապես խոշոր չափերով յուրացումը կամ վատնումը կազմակերպելը, դրդելը, օժանդակելը), իսկ գյուղատնտեսության նախկին նախարար Սերգո Կարապետյանին՝ 179-րդ հոդվածի 3-րդ մասի 1-ին կետով (առանձնապես խոշոր չափերով յուրացումը կամ վատնումը)։ Գործի քննության ընթացքում Սամվել Գալստյանն ու Սերգո Կարապետյանը մահացել են:

«Շատ պարզ բան է տեղի ունեցել։ Այդ ծրագիրը կարող էին իրականացնել 2 ընկերություն, Սերգո Կարապետյանն ընտրել է այն ընկերությունը, որը ավելի ցածր գին է առաջարկել , և, անկեղծ ասած, ուրախ չեմ պաշտպանել այն մարդուն, ով զրպարտել է ինձ, բայց իրականությունը դա է»,- ասաց Սերժ Սարգսյանը` նկատի ունենալով, որ Սերգո Կարապետյանի` Գյուղատնտեսության նախարար եղած ժամանակ գյուղատնտեսական աշխատանքների համար մատչելի գներով դիզելային վառելանյութի ձեռքբերման նպատակով պետական աջակցության ծրագիրն իրականացնելու մրցույթում շահել է «Ֆլեշ» ընկերությունը: