«Եթե հունը բարձրացավ, լցվելու է գյուղի մնացած դաշտերը»․ կոյուղաջրերը ծաղկուն այգին ճահճի են վերածել. ՏԵՍԱՆՅՈՒԹ

Քանաքեռավանի բնակիչ Կարեն Տոնոյանի՝ մեկուկես հեկտար այգու տարածքն է։ Ասում է՝ մինչև 2018 թվականն այս այգին իրենց եկամտի միակ աղբյուրն էր,  այստել եղել են պտղատու ծառեր, հարուստ բուսականություն, իսկ այսօր մնացել են այս չորացած կոճղերն ու այրված դաշտը։

Պատմում է՝ դեռևս 2018-ին իր այգով անցնող կոյուղատարը վնասվել է, երկու տարուց ավելի կոյուղաջրերը լցվել են այգի։ Նրա խոսքով՝ եղել են դեպքեր, երբ ջրի մակարդակն այնքան է բարձրացել, որ ջուրը հասել է մինչև Հրազդան գետ։

Կարեն Տոնոյանի խոսքով՝ այս կոյուղատարի պատասխանատուն «Վեոլիա Ջուր» ընկերությունն է։ Ընկերությունից, սակայն, մեկնաբանություն ստանալ չհաջողվեց, մեր հեռախոսազանգերին չպատասխանեցին։

Ըստ Դատալեքս տեղեկատվական համակարգի՝ Կարեն Տոնոյանը 2020-ին ընդդեմ «Վեոլիա Ջուր» ՓԲ ընկերության հայցադիմում է ներկայացրել առաջին ատյանի ընդհանուր իրավասության ըդատարան 900,000 ՀՀ դրամ պատճառված վնասի հատուցման պահանջի մասին: Դատարանը գործը վարույթ է ընդունել, նախնական դատական նիստեր են կայացվել, սակայն, ըստ Տոնոյանի, դրանք մինչև հիմա էական արդյունք չեն տվել․ դատալսումները հաճախ հետաձգվում են։  

Սրանք Կարեն Տոնոյանի անշարժ գույքի նկատմամբ իրավունքների պետական գրանցման, հողի սեփականության, կադաստրի կոմիտեի կողմից տրված փաստաթղթերն են։ Ասում է՝ «Վեոլիա Ջուր»-ը դատական լսումների ժամանակ  կասկածի տակ էր դրել նաև հողի սեփականության հարցը։ 

Այգին ընտանիքին գյուղատնտեսությամբ և անասնապահությամբ զբաղվելու հնարավորություն է տվել։ Կարեն Տոնոյանը պատմում է, որ ընտանի կենդանիներ է պահել, որոնց համար այստեղից նույնիսկ խոտ է կարողացել հավաքել։  

Կարեն Տոնոյանը նշում է՝ իր պահանջն այն է, որ «Վեոլիա Ջուր»-ը փոխհատուցի իրեն պատճառած վնասը։ Ասում է՝ սա մեծ խնդիր է ոչ միայն իր, այլև գյուղի մյուս բնակիչների համար, քանի որ այս կոյուղաջրերը կարող են վնաս հասցնել նաև այլ այգիների։ 

Մանրամասները՝ տեսանյութում։

Անի Թամրազյան