Հասարակություն
08.08.2023 | 20:11
«Խաչակիրներ» ջոկատն առավոտից բողոքի ակցիա է իրականացնում ՀՀ կառավարության շենքի մոտ` պահանջելով զենք և փոխադրամիջոց Հակարիի կամուրջը բացելու համար։ Ակցիայի մասնակիցները մինչև ժամը 18։00-ն ժամանակ էին տվել կառավարությանը` իրենց պահանջները բավարարելու համար։
Ժամանակը լրանալուց հետո նրանք փակեցին Տիգրան Մեծ պողոտայի՝ Հանրապետության հրապարակին հարող հատվածը` ցանկանալով կանգնեցնել պատահական ավտոբուս և գնալ Կոռնիձոր։ Ոստիկանությունը 5 րոպե ժամանակ տալուց հետո փորձեց բացել ճանապարհը, գործողությունների ընթացքում բերման ենթարկեցին ակցիայի որոշ մանակիցների։
ՆԳՆ ոստիկանության լրատվական ծառայությունից Factor.am-ի հարցին ի պատասխան հայտնեցին, որ Կառավարության շենքի մոտից 14 քաղաքացի է բերման ենթարկվել: Ոստիկանությունից նաև նշեցին, որ քաղաքացիները բերման են ենթարկվել՝ ոստիկանի օրինական պահանջը չկատարելու վարչական իրավախախտման հոդվածով:
