Երևանի բախտը չեն կարող որոշել պատահական մարդիկ․ Հայկ Մարությանը կմասնակցի ավագանու ընտրություններին․ ՏԵՍԱՆՅՈՒԹ

Դերասան, Երևանի նախկին քաղաքապետ Հայկ Մարությանը հանդես է եկել հայտարարությամբ՝ տեղեկացնելով, որ պատրաստվում է մասնակցել Երևանի ավագանու առաջիկա ընտրություններին։

«Ես հայտարարում եմ, որ իմ թիմի հետ միասին մասնակցելու եմ Երևանի ավագանու առաջիկա ընտրություններին։

Սիրելի երևանցիներ, մենք համոզված ենք, որ մեր քաղաքի բախտը չեն կարող որոշել ինչ-որ անհասկանալի ու պատահական մարդիկ։ Միակ որոշողը դուք եք, առանց ձեզ ոչ ոք ոչ մի բան չի որոշելու»,- ֆեյսբուքյան իր էջում հրապարակած տեսանյութում հայտարարել է Մարությանը։

«Վերջին շրջանում տարբեր վայրերում ինձ մոտենում են մեր քաղաքացիները և հարցնում են՝ արդյո՞ք Երևանի քաղաքապետի ընտրություններին առաջադրելու եմ իմ թեկնածությունը։ Պատասխանս միշտ նույնն էր՝ դեռ չեմ որոշել։
Ինձ ասում են՝ Հա՛յկ ջան, բա քեզ պե՞տք ա, քո համար առոք-փառոք ապրում ես, ամեն ինչ ունես՝ սերը, հարգանքը, բարեկեցիկ կյանքը։ Ընդ որում, այդ նույնն ինձ ասում էին 2008 թվականին, երբ մասնակցում էի ընդդիմության միտինգներին, նույնը ասում էին տրանսպորտի թանկացման դեմ պայքարի ժամանակ, նույնը ասում էին 2018 թվականի հեղափոխության ժամանակ։ Մի խոսքով՝ միշտ։ Առաջին հայացքից այս խոսքերի մեջ կա տրամաբանություն, բայց դա՝ միայն առաջին հայացքից, որովհետև չի կարող մարդը ո՛չ անձնական, ո՛չ էլ ընտանեկան բարեկեցություն ունենալ, երբ շրջապատն անբարեկեցիկ է։ Չի կարող լինել անձնական երջանկություն, երբ համայնքդ ու երկիրդ երջանիկ չեն։

Ես կարծում եմ, որ դա պետք է ոչ միայն ինձ, այլև բոլոր այն մարդանց, ովքեր սիրում են իրենց քաղաքը, իրենց երկիրը, ովքեր անտարբեր չեն մեր հայրենիքի նկատմամբ, որովհետև եթե դա չանենք մենք, դա անելու են մարդիկ, ովքեր առաջնորդվում են միայն իրենց սեփական և խմբակային շահերով, ովքեր թքած ունեն, ընդ որում, այս անգամ արդեն ոչ միայն փոխաբերական, այլ ուղիղ իմաստով թքած ունեն մարդկանց, ժողովրդի և պետության շահերի վրա։
Հետևաբար, չենք կարող անտարբեր մնալ մեր կողքինների ճակատագրի նկատմամբ, չենք կարող չպայքարել մեր, մեր երեխաների և մեր ժողովրդի ապագայի համար», – նշել է Հայկ Մարությանը և հավելել, որ պայքարն ավարտված չէ։

«Ինձ պետք է, որ Երևանը ծաղկի, որ հասարակությունը դուրս գա ապատիայից, որ մեր Հայաստանը նորից ոտքի կանգնի»,-ընդգծել է Մարությանը։

Մանրամասները՝ տեսանյութում։