03.06.2026 | 23:39
ՌԴ-ն մտադիր է հայկական գյուղմթերքը փոխարինել Ադրբեջանից ներմուծումներով
Միջազգային հանրությունն անհապաղ քայլեր պետք է ձեռնարկի՝ կանխելու ԼՂ-ում էթնիկ զտումները․ ՀՀ ԱԳ փոխնախարարի արձագանքը Ալիևին
Քաղաքականություն
04.08.2023 | 14:27
ՀՀ ԱԳ փոխնախարար Վահան Կոստանյանն անդրադարձել է Ադրբեջանի նախագահ Իլհամ Ալիևի՝ Euronews հեռուստաընկությանը տված հարցազրույցի հայտարարությանը։
«Ադրբեջանի նախագահի հայտարարությունն այն մասին, որ «պատերազմում հաղթելն իր կյանքի, իր քաղաքական կյանքի առաքելությունն էր», հստակ ցույց է տալիս, թե ինչպես է անպատժելիությունը կանաչ լույս վառում նոր ոճրագործությունների համար։ Միջազգային հանրությունը պետք է անհապաղ քայլեր ձեռնարկի՝ կանխելու Լեռնային Ղարաբաղում էթնիկ զտումները»,- գրել է Կոստանյանը թվիթերյան իր էջում։
Հիշեցնենք, որ հարցազրույցում Ալիևը հայտարարել էր․ «Պատերազմում հաղթելն իմ կյանքի կամ գոնե քաղաքական կյանքի առաքելությունն էր, և ես այն հաջողությամբ իրագործեցի։ Մենք վերականգնել ենք արդարությունն ու մեր տարածքային ամբողջականությունը և հիմա խոսում ենք խաղաղությունից»։
Ադրբեջանի նախագահը բացահայտ խոսել էր նաև Արցախում էթնիկ զտում իրականացնելու իր մտադրության մասին։
«Այն մարդիկ, որոնք ապրում են Ղարաբաղում, այն տարածքում, որն այժմ ժամանակավորապես վերահսկվում է ռուս խաղաղապահների կողմից, գտնվում են Ադրբեջանում։ Նրանք պետք է ընտրություն կատարեն՝ կա՛մ մնալ այստեղ՝ ապրելու որպես մեր քաղաքացիներ ու ազգային փոքրամասնություն, գիտեք՝ մենք նրանցից շատ ունենք, կա՛մ հեռանան»,- հայտարարել էր Ալիևը։
Էմմա Չոբանյան
