13.01.2026 | 21:39
Երևանում և 8 մարզում էլեկտրաէներգիայի անջատումներ կլինեն
Դատավոր Կարեն Բիշարյանի լիազորությունները դադարել են
Հասարակություն
01.08.2023 | 18:01
Վճռաբեկ դատարանի Հակակոռակոռուպցիոն պալատի կոռուպցիոն հանցագործությունների քննության դատական կազմի դատավոր Կարեն Բիշարյանի լիազորությունները դադարել են։ Այս մասին տեղեկանում ենք Բարձրագույն դատական խորհրդի կայքից։
«Հիմք ընդունելով Վճռաբեկ դատարանի հակակոռուպցիոն պալատի կոռուպցիոն հանցագործությունների քննության դատական կազմի դատավոր Կարեն Ալբերտի Բիշարյանի կողմից 2023 թվականի հուլիսի 21-ին ստացված հրաժարականի վերաբերյալ դիմումը և ղեկավարվելով «Հայաստանի Հանրապետության դատական օրենսգիրք» սահմանադրական օրենքի 89-րդ հոդվածի 1-ին մասի 9-րդ կետով, 160-րդ հոդվածի 1-ին մասի 1-ին կետով և 2-րդ մասով, 94-րդ հոդվածի 1-ին մասով` Բարձրագույն դատական խորհուրդը որոշում է․
- 2023 թվականի օգոստոսի 1-ից Վճռաբեկ դատարանի հակակոռուպցիոն պալատի կոռուպցիոն հանցագործությունների քննության դատական կազմի դատավոր Կարեն Ալբերտի Բիշարյանի լիազորությունները համարել դադարած»,- ասված է ԲԴԽ որոշման մեջ։
Հիշեցնենք՝ Factor.am-ը հուլիսի 27-ին գրել էր, որ Բիշարյանն արձակուրդ է մեկնել, որի ժամկետը լրացել է, սակայն աշխատանքի չի վերադարձել և ազատման դիմում է գրել: Իրավապահ համակարգում շրջանառվում են խոսակցություններ, որ Բիշարյանն ԱՄՆ է տեղափոխվել: Բիշարյանը մինչև Վճռաբեկ դատարանի Հակակոռուպցիոն պալատի դատավոր նշանակվելը եղել է Վերաքնիչ քրեական դատարանի դատավոր, իսկ մինչ այդ` Մարտի 1-ի գործով դատախազ, պաշտպանել է Հայաստանի 2-րդ նախագահ Ռոբերտ Քոչարյանի մեղադրանքը։
Կարեն Բիշարյանի հետ կապ հաստատել մեզ չի հաջողվել․նրա հեռախոսահամարն անհասանելի է, իսկ համացանցային հավելվածների միջոցով զանգերն ու հաղորդագրությունները դատավորն անպատասխան է թողել:
Արաքս Մամուլյան
