Քաղաքականություն
28.07.2023 | 21:06
Եվրոպայի խորհրդի գլխավոր քարտուղար Մարիա Պեյչինովիչ Բուրիչը իր մտահոգությունն է հայտնել Արցախում տիրող հումանիտար իրավիճակի վերաբերյալ։
«Ես չափազանց մտահոգված եմ Լեռնային Ղարաբաղում հումանիտար և մարդու իրավունքների հետ կապված լուրջ իրավիճակով, և իմ մտքերն այն մարդկանց հետ են, որոնք կրում են այս իրավիճակի ծանրությունը։ Ես խստորեն կրկնում եմ իմ նախկին կոչերը՝ վերականգնելու ազատ տեղաշարժը Լաչինի միջանցքով։ Ուշադրություն եմ հրավիրում յոթ ամիս առաջ Մարդու իրավունքների եվրոպական դատարանի կողմից Լաչինի միջանցքի վերաբերյալ ընդունված միջանկյալ միջոցների վրա»,- ասվում է հայտարարության մեջ։
Բուրիչը նաեւ կոչ է անում կողմերին իրական երկխոսության մեջ մտնել Լաչինի միջանցքով ազատ և անվտանգ անցումն արագ ապահովելու նպատակով։
«Այս երկխոսությունը պետք է նաև հանգեցնի լարվածության թուլացմանը և խաղաղության վերականգնմանը՝ նաև համաձայն այն պարտավորությունների, որոնք Հայաստանը և Ադրբեջանը ստանձնել են ավելի քան 23 տարի առաջ Եվրոպայի խորհրդին անդամակցելիս»,- ասվում է հայտարարության մեջ։
Հավելենք, որ Ադրբեջանը արդեն երրորդ օրն է՝ թույլ չի տալիս, որ Հայաստանից հումանիտար բեռները տեղափոխվեն Արցախ։
Էմմա Չոբանյան
