Դատապարտում ենք Ալիևի ռեժիմի անսահման կեղծավորությունը․ Լրագրողների առանց սահմանների կազմակերպությունը՝ Շուշիի մեդիաֆորումի մասին

Լրագրողներ առանց սահմանների (RSF) միջազգային կազմակերպությունն անդրադարձել է հուլիսի 22-23-ը Ադրբեջանի իշխանությունների կողմից Արցախի գրավյալ Շուշի քաղաքում կազմակերպված մեդիաֆորումին։

«Ադրբեջանի կողմից կազմակերպված գլոբալ մեդիաֆորումն ավարտվել է առանց Ադրբեջանի մամուլի համար առաջընթացի։ Բացատրություն՝ անկախ լրատվամիջոցներն ու լրագրողները հեռու են պահվել միջոցառումից: RSF-ը դատապարտում է Իլհամ Ալիևի ռեժիմի անսահման կեղծավորությունը»,- ասվում է կազմակերպության թվիթերյան գրառման մեջ։

Հիշեցնենք, որ Ադրբեջանի նախագահ Իլհամ Ալիևի հանձնարարությամբ և պետական ֆինանսավորմամբ հուլիսի 22-23-ը Շուշիում անցկացվել է «Նոր մեդիա՝ 4-րդ արդյունաբերական հեղափոխության դարաշրջանում» գլոբալ մեդիաֆորումը։ Միջոցառմանը մասնակցել է 50 երկրից 120 լրատվամիջոցի ներկայացուցիչ, այդ թվում՝ 34 երկրի պետական լրատվականներ։ Ֆորումն ավելի քան 150 հյուր է ունեցել։

Հավելենք, որ ֆորումին մեծաթիվ լրագրողներ են մասնակցել Թուրքիայից՝ պետական գործակալությունների և իշխանամետ լրատվականների ներկայացուցիչներ, նաև թուրքական պետական TRT world հեռուստալիքի օտարազգի լրագրողները։ ՌԴ-ից մասնակցել է ՏԱՍՍ պետական գործակալության գլխավոր տնօրենի տեղակալ Միխայիլ Գուսմանը, պետական դաշնային ՆՏՎ հեռուստալիքը, ինչպես նաև ադրբեջանական լոբբիստներ Սերգեյ Մարկովն ու Իգոր Կորոտչենկոն։

Վրաստանը ևս ակտիվ մասնակցել է ֆորումին։ Մասնավորապես, մասնակիցների թվում են եղել Վրաստանի Հանրային հեռուստաընկերության գլխավոր տնօրեն Թինաթին Բերձենիշվիլին, վրացի քաղաքագետ Գելա Վասաձեն։ Հարևան Իրանից ֆորումին ներկայացված է եղել պետական IRNA  գործակալությունը։ Ի դեպ, ֆորումի ժամանակ հայտարարվել է, որ IRNA-ն Ադրբեջանում բյուրո է բացելու։

Էմմա Չոբանյան