Գրիգորի Խաչատուրովի կալանքը ևս 3 ամսով երկարաձգվել է

Հակակոռուպցիոն դատարանը, դատավոր Արամ Գրիգորյանի նախագահությամբ, որոշում է կայացրել ևս 3 ամսով երկարացնել երրորդ բանակային կորպուսի նախկին հրամանատար, գեներալ Գրիգորի Խաչատուրովի կալանքը։ Տեղեկությունը Factor․am-ի հետ զրույցում հաստատեց պաշտպան Հակոբ Ենոքյանը։

Ուշագրավ է, որ վերջին անգամ եռամսյա ժամկետով Խաչատուրովի կալանքը երկարաձգվել էր մայիսին, հետևաբար, խափանման միջոցի փոփոխումը պետք է քննարկվեր օգոստոսին։

«Կալանքի մասով հերթական ապօրինի որոշումը կայացվեց։ Քանի որ հերթական նիստը նշանակվելու էր սեպտեմբերին, դատավորը նպատակահարմար գտավ հիմա քննարկել խափանման միջոցի ընտրության հարցը, որի արդյունքում երկարացվեց կալանքը»,- ասաց պաշտպան Ենոքյանը։

Հիշեցնենք՝ վարույթի շրջանակում մեղադրանք է ներկայացվել ՀՀ պաշտպանության նախկին նախարար Սեյրան Օհանյանին` ՀՀ քրեական օրենսգրքի 179-րդ հոդվածի 3-րդ մասի 1-ին կետով և 3 դրվագ 308-րդ հոդվածի 2-րդ մասով (առանձնապես խոշոր չափերով գույքի վատնում և պաշտոնեական լիազորությունների չարաշահում, որն անզգուշությամբ առաջացրել է ծանր հետևանքներ)

Կառավարությանն առընթեր անշարժ գույքի կադաստրի պետական կոմիտեի նախկին նախագահ Մանուկ Վարդանյանին մեղադրանք է առաջադրվել ՀՀ քրեական օրենսգրքի 308-րդ հոդվածի 2-րդ մասով (պաշտոնեական լիազորությունների չարաշահում, որն անզգուշությամբ առաջացրել է ծանր հետևանքներ), իսկ ՀՀ պաշտպանության նախարարության N զորամասի նախկին հրամանատար Գրիգորի Խաչատուրովին` ՀՀ քրեական օրենսգրքի 190-րդ հոդվածի 3-րդ մասի 1-ին եւ 3-րդ կետերով (փողերի լվացում, որը կատարվել է առանձնապես խոշոր չափերով և պաշտոնեական դիրքն օգտագործելով)։

Մեղադրանք է ներկայացվել նաև «Մոսթոն Ինժիներինգ» ընկերության տնօրեն Դավիթ Գալստյանին՝ ՀՀ քրեական օրենսգրքի 178-րդ հոդվածի 3-րդ մասի 1-ին կետով և 325-րդ հոդվածի 1-ին մասով (առանձնապես խոշոր չափերով խարդախություն և փաստաթղթի կեղծում) և ևս 9 անձի:

Դավիթ Գալստյանի խափանման միջոցի հարցը քննարկվեց շաբաթներ առաջ. նրա մասով ընտրված կալանքը վերացվեց՝ սահմանվելով 30 միլիոն դրամ գրավ։ Այս պահին Գալստյանն ազատության մեջ է։

Ռոզա Վարդանյան