13.01.2025 | 18:26
«Մայր Հայաստան» խմբակցությունը Երևանի ավագանու արտահերթ նիստ կգումարի
Ուրուգվայում ՀՀ դեսպանություն կբացվի
Քաղաքականություն
20.07.2023 | 13:58
Ուրուգվայի Արևելյան Հանրապետությունում Հայաստանի Հանրապետության դեսպանություն կբացվի։ Որոշումն ընդունվել է ՀՀ կառավարության այսօրվա նիստում, հարցն ընդգրկված էր չզեկուցվողների շարքում։
Նախագծում նշվում է, որ ՀՀ ԱԳՆ-ն 2023 թվականի բյուջետային հայտում ներկայացրել է Ուրուգվայում դեսպանություն բացելու և գործունեություն ծավալելու նախահաշիվ, որն ապահովվել է: Ուրուգվայում ՀՀ դեսպանության բացումը նախատեսված է նաև Կառավարության 2021-2026 թվականների ծրագրով:
Կառավարության հիմնավորման մեջ նշվում է, որ Հարավային Ամերիկայում Ուրուգվայը տնտեսապես ամենակայուն և ամենաակտիվ զարգացող երկրներից է, որի հետ առկա են համագործակցության զարգացման հեռանկարային ոլորտներ, այդ թվում՝ բարձր տեխնոլոգիաների, կրթության և առողջապահության, առևտրատնտեսական բնագավառներում:
«Հարավային Ամերիկայում գործում է ՀՀ երկու դեսպանություն, որոնք գտնվում են Բուենոս Այրեսում և Բրազիլիայում, և հավատարմագրված են 4-5 երկրում: Ուրուգվայում ՀՀ ռեզիդենտ դեսպանությունը հնարավոր կդարձնի նաև տարածաշրջանի այլ երկրների հետ ավելի ակտիվ երկխոսության ծավալումը, հայ համայնքի ակտիվ ներկայությունը և նրա ազդեցությունը Ուրուգվայի սոցիալ-տնտեսական, հասարակական կյանքում»,- ասվում է նախագծում:
Նշենք, որ 2019 թվականի օգոստոսից Երևանում գործում է Ուրուգվայի դիվանագիտական ներկայացուցչությունը՝ գլխավոր հյուպատոսության, իսկ 2021 թվականի հոկտեմբերից՝ դեսպանության մակարդակով։
Հիշեցնենք նաև, որ Ուրուգվայն առաջին երկիրն է, որ 1965 թվականին պաշտոնապես ճանաչել և դատապարտել է Օսմանյան կայսրության կողմից իրագործված Հայոց ցեղասպանությունը։
