Բրյուսելն անհանգստացած է ԼՂ-ում հումանիտար իրավիճակով և կոչ է անում Բաքվին՝ ապահովել Լաչինի միջանցքով տեղաշարժը․ ԵՄ առաքելությունը՝ ԵԱՀԿ Խորհրդի նիստում

ՀՀ ԱԳ նախարար Արարատ Միրզոյանը Հայաստանից կողմից հրավիրված ԵԱՀԿ Մշտական խորհրդի հատուկ նիստում այսօր ելույթ է ունեցել։ ԵԱՀԿ-ում ԵՄ պատվիրակության մշտական ներկայացուցիչ Ռասա Օսրաուսկայտեն ևս մեկ անգամ հնչեցրել է Բրյուսելի կոչն Ադրբեջանի իշխանություններին՝ ապահովել Լաչինի միջանցքով ազատ տեղաշարժը։

Ողջունելով Արարատ Միրզոյանին՝ նա նշել է, որ ՀՀ ԱԳ նախարարի՝ 2023 թվականի հունվարին Վիեննա կատարած այցից հետո ականատեսն են եղել Երևանի և Բաքվի միջև համապարփակ և արդյունավետ բանակցությունների՝ շնորհիվ Եվրամիության ակտիվ ներգրավվածության և Ամերիկայի Միացյալ Նահանգների լրացուցիչ ջանքերի՝ չնայած վերջին մի քանի ամիսների ընթացքում լարվածության անհանգստացնող աճին։ ԵՄ ներկայացուցիչն ասել է, որ անցյալ շաբաթ ՀՀ վարչապետ Նիկոլ Փաշինյանի և Ադրբեջանի նախագահ Ալիևի բրյուսելյան վերջին եռակողմ հանդիպումից հետո Եվրոպական խորհրդի նախագահ Միշելը խրախուսել է երկու առաջնորդներին ձեռնարկել հետագա խիզախ քայլեր՝ ապահովելու վճռական և անշրջելի առաջընթաց կարգավորման ուղու վրա։

«Հատկապես, ԵՄ-ն ակնկալում է, որ ադրբեջանական կողմը կոնկրետ քայլեր կձեռնարկի՝ Լեռնային Ղարաբաղում հայ բնակչության իրավունքների և անվտանգության հստակ հավաստիացումներ տրամադրելու ուղղությամբ։ Բոլոր չլուծված հարցերը պետք է լուծվեն բանակցությունների միջոցով՝ առանց ուժի կիրառման կամ սպառնալիքի։ ԵՄ-ն բազմիցս կոչ է արել Ադրբեջանի իշխանություններին ամբողջությամբ ապահովել ապրանքների և մարդկանց տեղաշարժի վերականգնումը Լաչինի միջանցքով՝ համաձայն ՄՔԴ-ի 2023 թվականի փետրվարի և հուլիսի հրամանների, ինչպես նաև էներգիայի անսահմանափակ մատակարարումները։ Նման ազատ տեղաշարժի սահմանափակումները զգալի անհանգստություն են առաջացնում տեղի բնակչության շրջանում: ԵՄ-ն անհանգստացած է ներկայիս սահմանափակումների հետևանքով սննդամթերքի, դեղամիջոցների և առաջին անհրաժեշտության այլ ապրանքների պակասի հետևանքով մարդասիրական ազդեցությունից։ Ադրբեջանի իշխանությունների կողմից ԿԽՄԿ-ի փոխադրումների արգելքը անհանգստացնող է եղել: Ներկայիս իրավիճակը կայուն չէ և լարվածություն է ստեղծում, որը հակասում է վստահության ամրապնդման համար անհրաժեշտ ջանքերին»,-ասվում է հայտարարության մեջ։

Նշվում է, որ ԵՄ-ն նաև հիշեցնում է Հայաստանում ԵՄ դիտորդական առաքելության կարևորությունը, որի նպատակն է նպաստել ԵՄ-ի կողմից աջակցվող կարգավորման ջանքերին նպաստող միջավայրի ապահովմանը:

Բացի այդ, ԵՄ-ն վերահաստատել է ամուր աջակցությունը կայուն, ժողովրդավարական, ինքնիշխան և բարգավաճ Հայաստանին։

«Մենք ողջունում ենք Հայաստանի շարունակական հանձնառությունը բարեփոխումներին՝ մեր ընդհանուր արժեքներին համապատասխան՝ չնայած տարածաշրջանի անվտանգության բարդ համատեքստին։ Կշարունակենք միասին աշխատել՝ ամրապնդելու մարդու իրավունքները և հիմնարար ազատությունները, ներառյալ՝ խոսքի ազատությունը և լրատվամիջոցների ազատությունը: Այս առումով կարևոր է դատական իշխանության անկախության և արդյունավետության շարունակական բարելավման և կոռուպցիայի դեմ պայքարը՝ հանրային կառույցների նկատմամբ քաղաքացիների վստահությունը բարձրացնելու, ինչպես նաև բոլոր հիմքերով խտրականությունը վերացնելու նպատակով»,- ասվում է հայտարարության մեջ։

Նշվում է, որ ԵՄ-ն պատրաստ է շարունակել աջակցել Հայաստանին Համապարփակ և ընդլայնված գործընկերության համաձայնագրի իրականացման և սոցիալ-տնտեսական մարտահրավերների լուծման գործում: Բացի այդ, ԵՄ-ն վերահաստատում է շարունակական աջակցությունը Հայաստանին, նրա քաղաքացիներին՝ Ադրբեջանի հետ նրա հարաբերությունների կարգավորման գործընթացում։

«Բրյուսելը պատրաստ է նպաստել վստահության և տարածաշրջանային անվտանգության ամրապնդմանն ուղղված բոլոր ջանքերին»,- նշվում է հայտարարությունում։

Էմմա Չոբանյան