Բաքուն ամեն օր ապացուցում է, որ դիմում է միջազգային քրեական հանցագործությունների․ Էդմոն Մարուքյան

Ադրբեջանն ամեն օր ապացուցում է, որ ի վիճակի չէ ապահովել անգամ այն նարատիվները, որոնք ձևակերպում է միջազգային հանրության աչքի առաջ։ Այս մասին Թվիթերում գրել է ՀՀ հատուկ հանձնարարություններով դեսպան Էդմոն Մարուքյանը։

«Օրինակ՝ Ադրբեջանը պնդում է, թե իրենք ցանկանում են Լեռնային Ղարաբաղի հայերին ինտեգրել, և որ նրանք իր քաղաքացիներն են։ Միջազգային հանրությունն Ադրբեջանից պահանջում է վստահության ամրապնդման միջոցներ ձեռնարկել և ուղիղ բանակցություններ սկսել Լեռնային Ղարաբաղի հայերի ներկայացուցիչների հետ՝ ներդնելով միջազգային մեխանիզմ՝ Լեռնային Ղարաբաղի հայերի իրավունքների և անվտանգության երաշխիքներով։ Այս ամենին ի պատասխան՝ նախքան քրիստոնյա հայերին «ինտեգրելը», Ադրբեջանը սպանում է նրանց՝ կազմակերպելով տարբեր դիվերսիոն գործողություններ, ապա ոչնչացնում քրիստոնեական եկեղեցիներն ու քրիստոնեական ժառանգության հուշարձանները, հետևաբար՝ Ադրբեջանը քրիստոնյա հայերին ինտեգրելու ծրագիր չունի»,- գրել է Մարուքյանը։

Ավելին, ըստ նրա, 7 ամիս է՝ Բաքուն դադարեցրել է գազի և էլեկտրաէներգիայի մատակարարումը՝ շրջափակման մեջ պահելով ԼՂ հայ բնակչությանը, արդեն գրանցվել են սովից երեխաների մահվան դեպքեր։

«Բնականաբար, այս քայլերով Ադրբեջանը դիմում է միջազգային քրեական հանցագործության՝ բոլորի համար հասկանալի դարձնելով, որ վստահության ամրապնդման միջոցներ չի ձեռնարկում։ Ընդհակառակը, դա ցույց է տալիս, որ ներկայիս քաղաքականությունը միտված է ոչ թե հայ ժողովրդին ինտեգրելուն, այլ Լեռնային Ղարաբաղն էթնիկ զտումների ենթարկելուն, ի վերջո, տիրանալով հողին՝ առանց մարդկանց»,- ընդգծում է Մարուքյան։

Նա հավելում է, որ այս ակնհայտ վկայությունների ճնշման ներքո, որոնք արդեն իսկ ապացուցված են, միջազգային հանրության լիբերալ ժողովրդավարության ինստիտուտները կա՛մ պետք է ընդունեն, որ իրենք են Լեռնային Ղարաբաղի  120.000 հայերի և 30.000 երեխաների սովի, սպանությունների և էթնիկ զտումների հանցակիցը, կա՛մ հստակ քայլեր ձեռնարկեն միջազգային միջամտության տեսքով՝ դադարեցնելու մարդկության դեմ այս հանցագործությունները։

«Հակառակ դեպքում, 21-րդ դարը նշանավորվելու է մարդու իրավունքների ևս մեկ զանգվածային ոտնահարմամբ, ավելի կոնկրետ՝ միջազգային քրեական հանցագործությամբ, որը դեռևս կարող է կանխվել միջազգային հանրության կողմից»,-եզրափակել է Էդմոն Մարուքյանը։

Էմմա Չոբանյան